Kapin sa 500 ka tinun-an sa info drive

Kapin sa 500 ka mga tinun-an gikan sa usa ka pribadong tunghaan sa dakbayan sa Mandaue ang gipaubos sa information drive sa Mandaue City Police Office (MCPO) ubos sa ilang kampanya batok krimen kagahapon sa buntag.

Ang mga tinun-an sa Grade 3 ngadto sa 6 uban sa Grade 11 ug 12 gikan sa University of the Visayas-Mandaue maoy nitambong sa kalihukan nga gipasiugdahan sa MCPO- Women and Children Protection Desk (WCPD), Police Community Relations (PCR) ug City Mobile Force Company (CMFC).

Gihisgutan sa kapulisan sa maong kampanya mao ang mga dautang epekto sa iligal nga drugas, fraternity, pornography ug bullying.

Matod ni PCInsp. Mercy Villaro, information officer sa MCPO nga lakip sa ilang natuki mao ang hisgutanan kalabot sa tawhanong katungod sa mga bata, pag-ila ug unsay buhaton kon nakasinati og child abuse, human trafficking, sexual harassment, rape ug uban pa.

Dugang niya nga dakong matampo ang maong kampanya aron mahibalo ang mga tinun-an sa pag-ila sa nagkadaiyang klase sa pagpangabuso ug unsay saktong buhaton .

Nilungtad og tulo ka oras ang gihimong information campaign sa MCPO nga nagsugod alas 9 sa buntag.

Si Villaro niingon nga ang ilang gibuhat alang sa kaayuhan sa mga bata.

Ang UV-Mandaue maoy unang pribadong tunghaan nga ilang nabisita ning tuiga.

Gawas sa target sa MCPO nga bisitaon ang mga dagkong tunghaan, si Villaro nanghinaot sab nga gawas sa mga tinun-an, malakip sab unya sa umaabot nga ilang mahimamat ang mga ginikanan sa mga bata kon adunay panagtigum sa Parent-Teacher Association (PTA) sa mga tunghaan.

Kini aron nga ila sab magiyahan ang mga ginikanan kalabot sa mga isyu nga maka-apekto sa kabataan.