Di maoy solusyon

Tungod sa sunodsunod nga pagpamatay sa Sugbo, si Cebu City Mayor Tomas Osmeña nagplano sa pagpabutang og mga dashboard camera sa mga sakyanang publiko ug pribado. Nagtuo si Osmeña nga magpanagana ang mga kriminal sa pagbuhat og mga salaod, sama sa ambush tungod kay makuhaan na man og footage ni bisan kinsa ang ilang gibuhat.

Nagplano siya nga magkuha og budget gikan sa panudlanan sa Siyudad alang niini.

Apan makapaislag ba sa mga kriminal ang pagbutang og mga dash cam sa mga sakyanan ingon man close circuit television (CCTV) camera?

Tingali magpanagana ang mga kriminal, apan sa pagsanta sa mga krimen, di. Pila na man ka mga krimen, labina sa pagpatay sa high pro ile nga mga kriminal, ang nahitabo, apan hangtod karon wa masulbad?

Pila na man ka mga krimen ang nakuhaan og CCTV footage, apan wa gihapon magamit? Sama sa gunman ni anhing manlaban ug bise mayor Jonah John Ungab. Ang iya rang bayhon ug pagkadakuon nga tawo ang nakita, apan way nawong.

Niadto pang Abril kini nahitabo, apan hangtod karon hanap pa kaayo ang kasulbaran.

Ang mga dash cam ug CCTV camera magamit, apan di kini makasanta sa mga krimen.

Ang labing maayong pangsanta sa krimen mao ang way puas nga anti crime operations, sama sa paggukod sa mga gun smuggler, gun-for-hire nga mga sindikato, pagpahigayon og mga checkpoint ug 24/7 nga pagpatrolya sa kadalanan pinaagi sa pagpakatap sa kinabag-an sa kapulisan sa kadalanan.

Kini mahimo pinaagi sa epektibo kaayong intelligence gathering, partisipasyon sa komunidad ug uban pang mga sektor. Gikinahanglan usab nga palambuon ang crime investigation sa kapulisan nga dunay dako kaayong kakuwangan.