Nganong gipamatay ang taga PDEA?
Semana pa lang kapin ug wala pa gani mahatagi og kasulbaran ang kasong pagpusil-patay ni Philippine Drug Enforcement Agency (PDEA 7) assistant operations chief Baby Earl Rallos, lain na usab nga PDEA agent and gipusil-patay. Patay diha-diha dayon sulod sa iyang sakyanan si Von Rian Tecson human banhigi sa armadong mga tawo nga luwan sa usa ka Pajero ug duha ka mga managlahing mga motorsiklo. Luwas ang driver ni Tecson nga si Arnold Bauyahan, kinsa samdan.
Si Tecson, kinsa ka-batch ni Rallos sa PDEA academy, paingon sa dakbayan sa Sugbo sa dihang usa ka Pajero ang kalit mi-overtake ug nibabag sa iyang dalan. Gipaarakan dayon ang sakyanan sa atubangan nga bahin ug nipusil usab ang mga nagmotorsiklo. Apan gikatahong nakabawos si Tecson ug posibling napatay ang diha sa iyang kilid. Matod pa sa mga saksi nga posibling patay ang usa sa mga mibanhig kay kalit lang kining gisapnay sa ilang mga kauban ug gikarga sa Pajero nga morag sako sa kopras. Apan matod pa nga dako kining buhi sud sa usa ka pribadong tambalanan ning siyudad. Gisuta pa kini sa mga awtoridad.
Apan hangtod sa akong pagsuwat ning lindog, wala pay taho ang kapulisan kon na-admit ba kini sa tambalanan. Dili kaha kadto gitago sa ilang mga kauban kay mahadlok nga masakpan o mabuking labi pa kon siya pulis?
Kon dili kadto pulis, angay ibulgar ang identity sa maong tawo. Kana kon buhi pa.
Walay nakuha nga drugas sulod sa sakyanan ni Tecson. Diha ang iyang igsuon nga pulis sa dihang gi-process sa Scene of the Crime Operatives (Soco) ang mga butang sulod sa sakyanan. Kuyaw man god og adunay shabu nga makuha sama sa kang Rallos. Hangtod karon wala pa masuta kon nganong nagdala og drugas si Rallos. Planted ba kaha kadto sa mipatay kaniya?
Sama sa kaso ni Earl, nagpabilin nga tanghaga ug gumunhap ang kamatayon ni Tecson. Matod pa sa igsoon ni Tecson nga sa wala pa patya si Earl, misulti usab kini kaniya nga apil siya nga nakadawat og hulga. Matod pa nga gikan sa usa ka dakong druglord kansang mga tawo nadakpan sa PDEA ang pagpanghulga. Bout bang ipasabot nga ngilngig na kining mga druglords karon kay mopatay na og mga agents sa kagamhanan?