Safety net sa duha ka Mactan bridge

Nipasar ang Hunta Probinsiyal sa Sugbo og usa ka resolusyon nga nag-awhag sa kagamhanan sa mga siyudad sa Mandaue ug Mactan nga butangan og barbed wire o safety net ang duha ka taytayan nga nagdugtong sa Cebu ug Mactan aron wa nay mangambak gikan niini.

Daghan na ang nangambak gikan sa duha ka tulay. Apan sumala sa taho sa Superbalita Cebu mas daghan ang nangambak gikan sa unang Mandaue-Mactan Bridge nga hangtod karon wa pay ngan, di sama sa ikaduha nga ginganlan og Marcelo Fernan Bridge.

Si Cebu Provincial Board Member Victoria Corominas-Toribio niingon nga ang pagbutang og safety net o barbed wire usa ka pamaagi alang sa kaluwasan sa publiko, ilabi na niadtong dunay plano nga magkutlo sa ilang kinabuhi.

Way nag-ihap kon pila na kabuok ang nangambak sa Mandaue-Mactan Bridge. Ang labing popular nga ambakan mao ang Golden Gate Bridge sa San Francisco, USA. Sumala sa taho sa Time magazine, kapin na sa 1,200 ka mga tawo ang nagambak gikan sa maong taytayan.

Apan dunay nangabuhi. Sama sa Mandaue-Mactan Bridge. Dihay niambak kay naglain ang iyang kabuhi niadtong Abril 13, 2012 pero ni-survive. Ang problema kay dihay namana sa ilawom nga nanginabuhi, maoy pagtunga gikan sa ilawom sa dagat ug maoy naambakan sa nilukso nga gilainan sa kabuhi.

Napatay intawon si Danilo Sison, 59 anyos nga taga sitio Pasansi, barangay Pajo, LapuLapu City. Pataka man lang sab og lukso ang gilainan sa kabuhi, wa man tan-awa kon wa bay maangin.

Ang katapusang nilukso gikan sa maong taytayan mao ang usa ka 19-anyos nga babaye nga nagsakay og taxi. Gipahunong niya ang taxi, nanaog ug kalit nga niambak sa tulay niadtong kaadlawon sa Hunyo 30.

Mao nga maayo tingaling butangan og warning sign ang duha ka tulay nga mag-ingon nga “gidili ang paglukso gikan ning maong tulay.” Ang proble- ma ning mga tawo kay di man mopatuo ining mga warning.

Kanang butangan og “gidili ang paglabay og basura dinhi” mao na man hinuon ang labayan sa basura. Kon butangan og sign nga “gidili ang pagpangihi dinhi” mao na man hinuon ang pasiritan.

Butangan og barbed wire o safety net ang duha ka taytayan nga nagdugtong sa Cebu ug Mactan aron wa nay mangambak gikan niini.”