Maxine Medina moanhi sa Cebu karong Domingo
Basta beauty queen, artistahin.Adunay nisuway pero wa magdugay duna sab hinuoy beauty queens nga nagmalampuson sa pag-artista sama nila ni Gloria Diaz, Alice Dixson, Princess Lara Quigaman, Charo Santos, Elizabeth Oropesa, Pia Wurtzbach ug uban pa.
Labing bag-o nga nadugang mao si Ms.Universe-Phils. 2016 Maxine Medina nga bida sa “Pinay Beauty (She’s No White)”.
Nakita ni nako si Maxine sa personal kuyog ang Ms. New Zealand, Thailand ug China dihang nibisita sila sa Oslob ug nilangoy uban ang mga whalesharks aron pag-promote sa Ms. Universe pageant niadtong tuiga.
Karong Dominggo, mobisita si Maxine kuyog nila ni Edgar Alan Guzman, Janus del Prado ug Chai Fonacier kalabot sa pelikula. Magpasundayag sila sa Robinsons Galleria sa alas 4 pm.
Wa lang damha morag may natandog nga kwerdas sa akong kahiladman ang gisulti ni Hashtag Nico Natividad sa usa ka programa sa telebisyon nga kaniadto nangandoy siya nga kugoson sa iyang amahan.
Nabuwag diay ni siya sa iyang pamilya kay nagtrabaho sa Japan iyang papa sulod sa 32 ka tuig nga nisangpot sa panangbuwag sa iyang ginikanan. Segurado kong ang kasinatian nakatabang ni Nico sa iyang pag-artista labina sa mga eksena nga heavy drama.
Dugay na kong nahibulong kon nganong way proyekto si KC Concepcion sa telebisyon man o sa pelikula.
Na-excited kog gamay dihang gipahibalo nga may umaabot kining proyekto uban sa iyang kanhi uyab nga si Piolo Pascual ug ang kanhi ka-loveteam ni Piolo nga si Judy Ann Santos.
Maayo untag makabisita si KC sa Cebu kuyog silang Piolo ug Judy Ann kon hapit na isalida ang ilang proyekto aron atong mautingkay ang mga tipaka sa kagahapon nila ni Papa P. Aw!
Nakita nako si JC Santos ug Bela Padilla sa usa ka talk show karong semanaha. Gisungog sila nga posibleng magkauyab pero komedya ang ilang paagi sa pagtubag. Pareson baya sila.
Nagkauban sila sa niaging tuig sa 100 Tula Para Kay Stella. Karon, nagpares na sab sila sa The Day After Valentine’s nga apil sa 2nd Pista ng Pelikulang Pilipino sa Agosto 15-21. Atong atangan.