Nagselos sa ex sa bana

Dear Papa Joe,

Tawga lang ko og Anabel, 30 years old. Naa mi sa Saudi nagpuyo karon kauban sa akong bana nga engineer. Duna mi usa ka anak nga lalake.

Ang akong problema kay bahin sa akong bana. Duna man gud koy nabasahan nga communication nila sa iyang ex sa una nga naa diha sa Pilipinas karon. Naglagot kaayo ko kay nagpa sweet sweet pa ang babaye unya nanghuwam niya og kwarta. Nisamot pa gyud kog sinta sa kasuko dihang usa ka adlaw niana, duna koy nakit-an nga resibo sa usa ka kwarta padala diri sa Saudi. Iya jud diay gipadad-an og kwarta ang babaye. Perti namong away ug gusto na kong makigbuwag niya, Pero di man siya moangkon nga nagbalik sila kay matod pa niya nanginahanglan og kwarta ang babaye.

Sa pagkakaron, wala na mi tarong tinagdanay sa usag-usa kay dili man gyud ko malimot sa iyang gibuhat. Hangtod among anak nga gamay pa nadamay na sa among away. Nagsige siyag pangayog pasaylo nako pero dili pa ko ready kay di pako kalimot ug di ko makadawat. Unsa may akong buhaton? Pasayluon ba nako siya ug kalimtan ang nahitabo nga until now magsige pa man og chat niya ang girl? Please tambagi ko.

ANABEL

Dear Anabel,

Ang maayo nimong buhaton siguro nga magsinabtanay mo sa imong bana. Mag-estorya mog tarong kanang klaro ug duna pa ba siyay laing tuyo sa iyang ex-girlfriend gawas sa iyang pagpahuwam og kwarta. Basin diay og nitabang lang gyud siya sa iyang ex nga nanginahanglan. Wa may dautan niana.

Usa pa, wala man kaha kay nabasa nga ni-reply ang imong bana ug dunay malisya nga tubag sa iyang ex. Wala man pod ka makabasag kadudahan. Akong tambag nimo nga ayaw nalang padak-a pa, kay luoy ang inyong anak nga madamay. Daghang salamat.

PAPA JOE