Say you’ll stay
Gikablit ko sa bukton si Warren. Nakatan-aw siya nako. Nahibulong siya, klaro sa iyang reaksiyon. “May fan diay ka dinhi, Ren?” Mikidhat ko. “Fan?”
“Oo. Naay girl nga ganina rang sigeg tan-aw nimo.”
Gitudlo ko sa akong simod ang babaye nga naglingkod di layo namo ni Warren. Gitan-aw ni Warren ang babaye. Naniid ko sa iyang reaksiyon. Nakugang siya apan kadali ra. Unya mi-smile siya sa babaye nga nagpahiyom sab niya.
Nag-inusara lang ang babaye nga nagkaon.
“Si Gina na, Ruby. Anak sa kaila nila ni Mama ug Papa.” “Nganong nagkaila man mo?” “Kon dunay adtuon ang akong parents sa ila, pakuyugon man ko maong nagkaila mi si Gina.”
Wa na ko motingog. Unya mitindog si Warren.
“Kadyot lang, ha, Ruby, duulon nako si Gina. Kuyog nuon aron magkaila mo.” “Ikaw na lang, Ren.” Samtang mipadayon kog kaon, kanunay kong nagtan-aw kanila ni Warren ug Gina. Malipayon silang nag-estoryahay. Usahay mohapak si Gina sa bukton ni Warren. Suod gyud sila. Nasuta ko sa ilang mga lihok ug reaksiyon sa ilang nawong. Klaro nga komportable sila sa ilang sitwasyon.
Nakahuman na kog kaon sa pagbalik ni Warren nako.
“Nangutana sab siya nimo, Ruby. Gisultihan nako nga girlfriend tika.”
“Gisulti mo ba sab niya nga higpit nga magkaaway ang atong parents?”
“Wa na lang. Personal kaayo nang sitwasyona.”
Miyangu-yango ko. Unya, dunay lalaki nga miduol kang Gina. Nag-aper sila. Milingkod ang lalaki atbang kang Gina. Malipayon silang nagsultihanay.
“Kinsa man sab nang laki nga miduol kang Gina, Ren?”
Wa dayon motubag si Warren. Gitan-aw niya pag-ayo ang lalaki. Unya nanglingu-lingo si Warren.
“Wa man ko makaila ana niya, Ruby. Karon pa ko makakita niya. Aw, seguradong friend na ni Gina, o kaha klasmet niya.”
Guwapa si Gina, ug guwapo sab ang lalaki nga miduol ani. Nuon, guwapo man sab si Warren. Moreno ang pamanit. Di sum-ol ang hitsura. Di parehas sa ubang lalaki nga guwapo man tuod apan dali rang mawala ang pagka attractive, kana laging sum-ol nga pagka guwapo.
Nanindog sila si Gina ug ang lalaki. Unya sa wa pa molakaw si Gina, miwara-wara siya sa kamot kang Warren. Mibawos sab og wara-wara si Warren.
(SUMPAYAN)