Panaw sa planetang marte

Makusog ug tulin nga milupad ang gisakyan namong spaceship nga gipanag-iya ni Dr. Israel Y, usa ka inilang siyentipiko sa sakyanan sa kawanangan ug usa ka Pinoy astronaut sa nasod sa Amerika. Naghaguros kini sa kawanangan. Gitan-aw ko siya nga diha sa akong tupad, nagmaneho sa spaceship. Gikulbaan ko, apan daw wala siya batia’g kahadlok bisan gamay. Anad na siya niini ug tungod sab sa iyang kasinatian isip astronaut sa NASA, U.S.A. nga nakaadto na sa space station sa kawanangan. Apan ang kakulba nga gibati ko nagpadayon kay karon pa ko makasakay og spaceship.

Sayod kong lahi kining matang nga sakyanan sa kawanangan kay mora’g kuwitis nga midiretso la’g sirit sa ibabaw. Gilantaw ko ang palibot sa ubos, sa ka-islahan ug mga nasod sa kalibutan. “Wow! Kanindot!” nakatuaw ako.

Nanggunit ko pag-ayo sa puthaw nga haligi diha sa akong tungod samtang nagtan-aw sa mga panganod. Labi pa kong gikuyawan dihang misuot kami sa baga nga mga panganod.

“Sir, kalma lang kay tugkan ta’g nerbiyos ning kalakiha!” matod ko nga nag-usap og biskwit.

Mipahiyom si Israel Y kanako ug misulti, “Kaon gyud, Tisoy, kay wa ra bay baligya nga pagkaon sa gawas sa Earth, atong kalibutan. Gusto man kang mosuroy ngadto sa ibabaw sa kawanangan aron mosaksi sa kaanindot sa mga talan-awon didto.”

“Tinuod kana, Sir!” tubag ko nga nagpahiyom sa hilom.

Buntag kami nga minggikan sa Planetang Earth. Karon wa nako damha nga taudtaod na diay kaming naglupad sa kawanangan. Ngitngit na kini kaayo Sa akong pagtuo gabii na gayud. Nakita namo ni Dr. Israel Y ang dako kaayong buwan ug ang minilyon nga mga bituon maoy hayag kaayong midan-ag sa kawanangan. Unya mitadlas kami paingon sa outer space hangtod nahilayo na kami sa buwan. May gikuha sai Dr. Israel Y. Gitunol niya kini kanako. Oxygen apparatus alang sa dugang puwersa sa hangin aron kami makaginhawa. Wala na ko kamatikod sa hangin sa outer space. Gitaod ko ang oxygen apparatus sa akong ilong ug baba. Unya dihay mga dagkong bato nga misugat kanamo. Gikuyawan ko sa higanteng mga bato kay basi’g madasmagan kami ug maguba ang spaceship.

“Higanteng mga bato kana, Sir!” matod ko kang Dr. Israel Y.

Milikay-likay ang spaceship sa mga higanteng mga bato, nga mga ‘meteor’ diay. “T i soy,” sangpit ni Dr. Israel Y. “Ngano, Sir?” tubag ko. “Nakakita ka nianang morag lingin nga kolor pula?”

“Oo, Sir.”

“Mao kana ang planetang Mars o Marte.”

“Puwede ba kitang magpaduol, Sir?”

“Pwede, pero limitado ang oras kay dunay laing mga linalang nga naglibot niana, mga ‘alien.’”

Dihang duol na kami sa Marte may gitunol si Dr. Israel Y kanako, usa ka lahi nga matang sa teleskupyo nga taas kaayo og abot ang lantawon nga butang. Bisan unsa kalayo ang butang nga tan-awon sa maong teleskupyo makita kini nga mora lang og naa sa duol sa naglantaw. Gilili ko ang teleskupyo ug nakita ko ang maanindot nga mga talan-awon sa Marte. May mga kahoy ug mga bato. May inalisngaw sa kabugnaw sa among nahimutangan. Dili diay kainit sumala sa pangagpas sa ubang mga siyentipiko. Gikuha ko ang bolpen ug papel nga akong gisuksok sa akong hawak. Kining paghiabot namo sa Mars akong suwaton aron ipaambit sa tanan.

Unya may nakita si Dr. Israel Y sa monitor sa radar sa spaceship. May sakyanan sa ‘alien’ nga nagpaingon kanamo. Hayag kaayo kini ug makasulaw. Gipabulhot ni Dr. Israel Y ang among spaceship balik sa Planetang Earth. Mibiya na kami sa Planetang Marte. Ang nagsunod namo nga mga ‘alien’ kalit nahanaw dihang nakalusot na kami sa ‘stratosphere’ sa Earth.

“SALAMAT, Lord, nga nakabalik na mi sa Pinas!” nakasinggit ko sa kalipay. Apan nabati ko ang kasakit sa sagpa sa akong aping.

“Uy, Tisoy, sige ka lag katug diha! Hala pagkawos og tubig kay manglaba ko!” matod ni Nanay sa kusog nga tingog. “Nagdamgo ka lag sibukaw da!”

(KATAPUSAN)