SOTTO MILUWAS SA BATANG GILAS
Sulod na sa semis human gilubong ang Bahrain
Human sa pugdol nga opensa sa second quarter, ang Batang Gilas mipakita sa ilang kahanas sa third canto aron pukanon ang Bahrain, 67-52, nga maoy naghatag kanila og luna alang sa semifinals round sa 2018 Fiba Under-18 Asian Championship kagahapon sa Stadium 29 sa Nonthaburi, Thailand.
Si Kai Sotto maoy miluwas ug miduslit og balik sa kainit sa Gilas diin iyang gipuga ang napulo niya ka puntos, lakip na ang alley-ops nga hansak aron imbarguhon og balik ang labaw, 41-36, nga maoy bunga sa 15-2 nga rally nga gilamasan sa tres ni Miguel Oczon. Sayo unta nga nakaposte og 10 puntos nga labaw ang Batang Gilas sa opening quarter apan sa kalit lang nausab ang dagan sa dihang wala kini maka-score sulod sa siete minutos sa second quarter samtang mipabuto ang Bahrain og 21-0 nga rallly.
Sa kinatibuk-an si Sotto mitali og 21 puntos, 10 ka rebounds, tulo ka assists ug tulo ka blocks sa ikaupat nga kadaugan sa Philippines nga otomatiko usab nga naghatag kanila og ticket alang sa 2019 Fiba under-19 Basketball World Cup. Maayo usab nga nakaduwa si AJ Edu ug nakapugnit kinig 16 puntos, 17 ka rebounds, tulo ka assists, duha ka steals ug duha ka blocks.
Karong adlawa, ikasangka sa Philippines ang modaog tali sa Australia ug Japan alang sa semifinals round.
Ang mga pasa ni Dalph Panopio ngadto nila ni Sotto ug Edu sa ilawom nga bahin maoy naghatag og kalisdanan sa Bahrain ug sa katapusang 5:12 segundos nakaposte na og 55-45 nga labaw ang Gilas.
Si Ponopio igo ra man tuod nakahipos og kuwatro puntos apan aduna kini walo ka assists ug upat ka rebounds.
Sa kapildihan, ang Bahrain nga gipangulohan ni Bager Ali nga may 13 puntos ug siyam ka
rebounds, makigsangka na lang alang sa ikalimang puwesto.
Mga puntos: Philippines (67) – Sotto 21, Edu 16, Oczon 10, Ildefonso 6, Panopio 4, Abadiano 3, Ramirez 3, Amsali 2, Cortez 2, Chiu 0, Lina 0, Torres 0. Bahrain (52) – B. Ali 13, Awadh 13, M. Rashed 11, A. Rashed 7, Aboukuora 2, Dindayneh 2, Hamoda 2, Kadhem 2, A. Ali 0, Alrowaila 0, Al Koohiji 0, Nawaf 0. Quarters: 20-11, 26-34, 4845, 67-52.