Titulo sa yuta
Dear Noy Kulas,
Maayong adlaw kanimo, Noy. Itago lang ko sa ngan nga Silencer. Dugay na ko nagsunod aning imong tampo. Kining akong problema kabahin ni sa yuta nga akoang napalit. Niadtong 2016, nakapalit ko og yuta sa usa ka subdivision dinhi sa Sugbo. Ikatulo na ko nga nanag-iya sa yuta. Kay kining yutaa ang first nga tag-iya maoy nagbaligya niini sa akoang napalitan. So to make it clear, ibutang ta lang nga ang unang tag-iya mao si Pedro. Unya gibaligya ni Pedro ngadto kang Juan. Unya gikan ni Juan,
gibaligya diri kanako.
Noy, karon nga akoa na unta nga ipa-transfer ang title para mahingpit nga ako na gyod ang tag-iya sa yuta, pero giingnan ko sa taga BIR nga kinahanglan pa i-transfer ang title name ngadto sa first nga gibaligyaan una pa ma-transfer sa akoang name?
Ikaduha, maobligar ba ang akong gipalitan sa pagbayad sa pag-process sa pagpa-transfer sa title name ngadto sa ilaha nga sila man ang ikaduha nga tag-iya? Apan ang napalit namo ang yuta sa 2016 unya na clear ang documents sa 2017 nga kanus-a nagsugod ang new rules nga nag-ingon nga kinahanglang mabalhin usa sa first buyer and name before mabalhin sa last buyer. Daghang salamat, Noy. More power SILENCER
Silencer,
Sa yano lang usab nga pagsabot, ang imong transaksyon wala sa unang tag-iya, kon di sa ikaduhang tag-iya. Busa, gikinahanglan nga ang titulo magagikan niya, di sa unang owner. Di manglaktaw kay ang naay transaksyon sa unang tag-iya ang imo mang napalitan. Silang duha dunay mga obligasyon sa kagamhanan nga mao ang buhis. Gawas ka na sa ilang transaksyon.
Kon molaktaw ang imong napalitan sa yuta, di siya makabayad sa unsa may angay niyang bayran isip seller. Siya man ang namaligya, adto ka niya mokuha sa titulo, kansang ngan nga nakabutang kinahanglan iyaha kay siya man ang imong gipalitan. Kay siya usab ang seller, siya ang mobayad sa mga galastuhan sa pagpatitulo, unless, magsabot mo nga i-deduct ang tanan sa unsa may inyong nasabutan nga presyo. Mao gyud na ang naandan nga proseso.
Busa, ipasubay na lang gyud ninyo sa unsay naandan nga process, ayaw ilaktaw aron di magkaproblema puhon.