14-ANYOS GIPUSIL, PATAY
28-ANYOS NGA SUSPEK NASIKOP
Patay ang usa ka tinun-an sa grade 8 human kini gipusil sa usa ka 28-anyos nga nanimawos human giingon nga usa ning tinun-an sa nidapat sa iyang manghud.
Ang insidente nahitabo kagahapon sa kaadlawon sa Tacan Road, Barangay Budlaan, dakbayan sa Sugbo.
Naila ang biktima nga si Arjay Aranguez Niere, 14, residente sa Sitio Ylaya, Barangay Talamban, Cebu City ug tinun-an sa Canduman National High School.
Ang suspetsado kinsa nadakpan sa kapulisan human sa hot pursuit operation naila nga si Jeffrey Mercader Borinaga, residente sa Sitio Kapasar, Barangay Budlaan.
Matod ni PO2 Francel Buling, imbestigador sa maong insidente, nga gikan ni nagdisco si Niere kauban ang grupo niini.
Giingon nga usa ning biktima sa nibun-og sa menor de edad nga manghud ni Borinaga.
Ala 1:30 sa kaadlawon kagahapon, dihang naabtan ni Borinaga si Niere ug napusilan niini.
Duha ka mga samad pinusilan sa ulo ang naangkon ni Niere ug nadala pa kini sa tambalanan apan nakabsan sa iyang kinabuhi kagahapon sa hapon.
Gibutyag ni Buling sa Superbalita Cebu nga nadakpan na kaniadto si Borinaga tungod sa kalambigitan niini sa illegal nga drugas.
Mag-atubang og kasong murder ang suspetsado. Sa laing bahin, dead-onthe-spot ang usa ka lalake human pusila sa makadaghang higayun samtang natulog sa iyang balay sa sityo Mananga, Brgy. Tabunok, dakbayan sa Talisay niadtong Sabado alas 8:30 sa gabii.
Ang biktima giila sa kapulisan nga usa ka alyas “Jumong”, linghud ang pangidaron ug kasamtangang nag puyo sa maong dapit.
Gibutyag sa kapulisan nga ang biktima usa ka suspetsaong kawatan sa dakbayan sa Talisay ug nalambigit usab kini sa ilegal nga drugas.
Sa inisyal nga imbistigasyon nasayran sa imbistigador nga ang maong biktima usa pa lang ka buwan sa iyang giabangan nga balay ug samtang natulog kini, usa ka wa mailhing suspetsado ang kalit nga misulod sa iyang balay ug mipusil kaniya sa makadaghang nga higayun.
Ang biktima nga naigo sa nagkadaiyang parte sa iyang lawas gideklara dayon sa kapulisan nga dead on the spot. Na-recover gikan sa crime
scene ang unom ka gabhang nga basiyo sa .45 nga armas, usa ka revolver nga armas nga may unom ka buhing bala ug mga drug parapernalia nga gituohang gipanag-iya sa biktima.