PAMILYA NGA BALILI MIHANGYO OG RESPETO
“Pag-morning, naghatod pa siya sa anak namo (sa skwelahan),” matod sa asawa ni SPO1 Roderick Balili, kinsa uwahi kini niya nga naestorya.
Nihangyo kini nga respetaran ug himuong pribado ang kamatayon sa iyang bana, “Gusto kog private lang (ang iyang haya). Kanang igalang gani siya.”
Nasayran sa Superbalita Cebu nga breadwinner, maayo nga anak ug usa ka mapinangggaon nga amahan.
Mao kini ang paghulagway sa ginikanan ug asawa sa namatay nga si SPO1 Roderick Balili kinsa gihaya karon sa St. Peter’s Funeral Homes sa Imus, dakbayan sa Sugbo.
Apan dihang nahinabi sila sa tigbalita, nagdumili sila sa pagtubag sa mga pangutana nga may kalambigitan sa gikatahong “accidental firing” nga rason sa kamatayon sa pulis.
“Ang Ginuo nay bahala,” matod sa 60-anyos nga inahan ni Balili kinsa naghilak nga nahinabi sa tigbalita kagahapon.
“Wa na ko’y matawagan, wa nako’y mapangayuan.”
Ang inahan sa maong pulis nagkanayon nga bisan paman nga naminyo na iyang anak apan nagsige gihapon ang suporta niini sa ilaha isip mga ginikanan ug sa 10 ka mga manghud niini.
“Usahay rana makauli sa amo pero kanunay mopadala og kwarta para bugas, tubig ug kuryente,” matod niini kinsa anaa magpuyo sa bukirang bahin sa dakbayan sa Sugbo.
Uma ang nag-unang panginabuhi sa iyang amahan ug gusto gyud ni Balili nga mosunod ang iyang mga manghud niya pagkapulis hinungdan nga siya maoy gasuporta niini.