2.5 ka ektaryang luna sud sa SRP giandam alang sa landswap deal

Giindurso na sa committee on laws sa konseho ang ordinansa nga magbalhin sa pagpanag-iya sa yuta nga gibaylo sa Cebu City Government labot sa landswap deal ngadto sa Kapitolyo.

Si Konsehal Eugenio Gabuya Jr, maoy nipanday sa ordinansa aron ma-pormal ang pag-apil sa 2.5 ektaryas nga luna sa South Road Properties nga itugyan ngadto sa Cebu Provincial Government.

Nalangan ang paglakip sa maong propiedad sanglit adunay ordinansa ang Cebu City nga mahimong mabaligya o matugyan ngadto sa laing institution ang pahat sa SRP pinaagi sa ordinansa.

Gawas sa maong propiedad, gibaylo sa siyudad ang 7 ka ektarya nga kanhi giukopahan sa Cebu City Zoo, tibuok block 27 sa North Reclamation Area ug 14 ektaryas nga relocation site sa Pulpogan, Consolacion.

Kini aron maluwas og mahatagan sa seguridad sa ilang pagpuyo ang gibanabanang 5,000 ka mga panilya nga nagpuyo sa mga luna sa Kapitolyo nga nahimutang sa 11 ka barangay sa siyudad ubos sa Provincial Ordinance 93-1.

Base sa record, dul-an na sa 2,000 ka mga pamilya ang nakakuha og land title ( humana og bayad) laing kapin sa 1,000 ang nagsige pa og bayad samtang dul-an sa 2000 ang wa makabayad.

Si Mayor Tomas Osmeña ug Gobernador Hilario Davide III, nagpirmahay na sa memorandum of agreement (MOA) duha na ka semana ang nakalabay aron itugyan ang pagpanag-iya sa 93-1 ngadto sa City Hall ug vice versa.

Ang landswap deal usa kini sa mga campaign promise nila ni Osmeña ug Davide nga natuman na karon.