Bag-ong direktor alang sa LTFRB 7 molingkod karon

Sa pag-asumir sa bag-ong regional director sa Land Transportation Franchising and Regulatory Board (LTFRB) sa Central Visayas karong adlawa, mihangyo ang usa ka opisyal sa usa ka dakong grupo sa transportasyon sa Sugbo nga hingusgan usab niini ang kampanya batok sa colorum nga mga sakyanan sama sa gisugdan og buhat ni outgoing director Ahmed Cuizon.

Ala 1:30 karong hapon, himuon ang turnover ceremony tali ni Cuizon ug sa bag-ong director nga si Eduardo Montealto Jr., gikan sa LTFRB 7 Zamboanga Peninsula kun rehiyon 9 sa rehiyonal nga buhatan sa Central Visayas, dakbayan sa Sugbo.

Panghinaot ni Ryan Benjamin Yu, chairman sa Cebu Integrated Transport Cooperative (Citrasco), nga himuon usab nga usa sa mga prayoridad ni Montealto ang paggukod niadtong colorum nga mga sakyanan nga nakaapekto sa panginabuhi sa lehitimo ug rehistrado nga mga sakyanan.

Si Yu nanghinaot usab nga maminaw si Montealto, retiradong colonel sa Philippine Air Force, sa yangungo ug sentimento sa stakeholders sa transportasyon sa rehiyon.

Si Montealto, lumad nga taga siyudad sa Davao, bagohay lang gitudlo ni Presidente Rodrigo Duterte human niretiro sa PAF sa miaging tuig.

Samtang si Cuizon adto na madestino sa LTFRB 3 ug hulipan ang moretiro na sa serbisyo sa gobiyerno nga si Director Glenn Zaragoza.

Samtang, kon mahusay na ang gikinahanglan nga mga dokumento, magsugod na og biyahe dinhi sa Sugbo ang 20 ka bag-ong bus units sa Citrasco, sumala ni Yu sa Superbalita Cebu.