Dumadapig sa Chiong 7 mihimo og prayer walk
Human sa mga sentimento sa social media, ang mga miyembro sa mga pamilya ug mga tigpaluyo sa Chiong Seven-ang pito ka mga lalake nga gikonbikto sa pagdagit ug pagpatay sa magsuong Marijoy ug Jacqueline Chiong nag-prayer walk kagahapon sa buntag aron ipanawagan nga buhian sila gikan sa prisohan.
Kapin sa 200 ka mga tawo, kadaghanan mga sakop sa mga pamilya, kahigalaan ug supporters sa Chiong Seven, nagmartsa sayo sa buntag kagahapon gikan sa Casino Español paingon sa Fuente Osmeña, siyudad sa Sugbo.
Si Padre Robert Reyes, running priest ug aktibista, ang nangulo sa martsa ug prayer walk.
Apan sa wala pa mahuman ang prayer march, nihalad una og misa si Reyes sa St. Pedro Calungsod Shrine sa Archbish- op’s Palace alas 7 sa buntag.
Usa sa mga apela sa grupo nga hangyuon si Pres. Rodrigo Duterte nga hatagan og executive clemency ngadto sa pito ka mga konbiktado nga sila si Juan Francisco “Paco” Larrañaga, Josman Aznar, Rowen Adlawan, Alberto Allan Cano, Ariel Balansag, ug magsuong James Anthony ug James Andrew Uy.
Sa iyang wali, niawhag sa mga tigpaluyo ug mga miyembro sa mga pamilya sa Chiong Seven nga ipadayon ang pag-ampo aron ma-review ang kaso.
Siya nagtuo nga ang pito ka mga konbiktado kay mga biktima sa inhustisya ug napresentar isip “fall guys” isip mga kriminal.
Matod ni Reyes, ang kawsa sa Chiong Seven nabanhaw human mapagawas ang salida nga “Jacqueline Comes Home.”
Ang salida, gi-direhir ni Ysabelle Peace Caparas ug gi-produce sa iyang amahan, kanhi National Artist Carlo J. Caparas, nagsaysay sa sugilanon sa magsuong Chiong nga gidagit ug gipamatay.