LTE na sa Cebu Safari sa lungsod sa Carmen
Mamahimo na nga maka-post sa selfies ug maka Facebook Live sa Cebu Safari and Adventure Park sa lungsod sa Carmen, amihanang Sugbo kini human usa ka telecommunications company ang ni-upgrade sa ilang signal sa dapit.
Ang Smart Communications, Inc., nipalapad sa ilang coverage sa usa nag-inusarang Safari sa nasod, diin LTE na sa Cebu Safari and Adventure Park.
Niadtong Sabado lang dihang pormal na nga gilusad sa kagamhanan sa Smart ug sa Cebu Safari nga LTE coverage na kini.
Hinuon, gibutyag ni Alvin Illano, field operations head sa Smart, nga 60 porsyento pa sa kinatibuk-ang Safari ang LTE coverage.
Duha ka mga macro cellsites ang ilang gibutang diin anaa kini gipapilit sa usa ka building sulod sa maong Safari.
Dugang ni Illano nga unang phase palang kini sa ilang pagpalapad sa LTE coverage sa dapit ug tumong nila nga mahuman ang second phase sa dili pa ang holiday season diin gipanglantawan nga dagsa ang tawo.
Ang tag-iya sa Safari nga si Michel Lhuillier nagpasalamat usab sa Smart ug gitug-an niini nga gikinahanglan nila ang mas lapad pa nga pagpaila sa Safari dili lang sa nasod apan lukop tibuok kalibutan.
“We are very grateful that we have this. We actually started our online payroll system now, thanks to the Wi-Fi. We are becoming more efficient, and we believe that with the partnership, it will be more efficient for us and it helps us market our park here,” matod ni Edward Loop ang Chief Operations Officer sa Safari.
Abli ang Cebu Safari gikan sa alas 8 sa buntag hangtod alas 5 sa hapon.