COA MIBADLONG SA OSLOB
Gibadlong sa Commission on Audit (COA) ang lokal nga kagamhanan sa lungsod sa Oslob sa kalangay pagdeposito sa mga koleksyon gikan sa kita sa whale shark watching niadtong miaging tuig nga mo-average og P1.2 milyones matag adlaw.
Sa 2017 audit report, sumala sa COA nga maabtan og hangtod sa 18 ka adlaw o moabot og P23.6 milyones ang makolekta nga kita sa munisipyo sa dili pa madeposito sa authorized government depository bank (AGDB).
Kini nga pagkalangay, matod sa mga state auditor, delikado kay posible mawala ang mga kwarta sa sunog, makawat o magamit sa lain.
Dugang sa COA usa usab kini ka kalapasan sa Item 33.a sa mga balaod ug mga lagda sa cash examination ubos sa Revised Cash Examination Manual.
Ubos sa Item 33.a sa Laws and Rules sa Cash Examination on the Revised Manual sa cash examination, nagsaysay nga ang local treasurer o kahera kinahanglan nga intact nga ideposito ang mga koleksyon nga gitugyan sa mga collector o tellers sa AGDB matag adlaw o sa sunod adlaw.
Sa exit conference nga gipahigayon, ang municipal treasurer sa Oslob niasoy nga ang pagkalangay nagagumikan kay nagpaabot pa sila ma-release ang 60 porsyento nga bahin sa kita sa Oslob Fishermen’s Association kay ipa-encash pa nila ang mga tseke nga gibayad bisan kon makita sa mga deposit slip ang cash deposits.
Ang municipal treasurer sumala sa report sa COA niangkon nga kini na ang ilang naandan nga gibuhat sukad sa una tungod kay maglisod sila kon himuon matag adlaw ang pagdeposito sa mga koleksyon.
Ang munisipyo nipahibawo sa COA nga nitanyag ang Development Bank of the Philippines (DBP) nga mo-pick up matag adlaw sa ilang mga koleksyon ubos sa kondisyon nga mobalhin sila og deposito sa maong banko.
Base sa verification sa mga koleksyon gikan sa whale shark watching gikan sa Enero hangtod sa Nobiyembre 2017 nga ning-average og P1.2 milyones, nagpakita nga ang mga deposito nga gihimo sa municipal treasurer kay dili intact ug ang dakong bahin sa kantidad ang naa sa iyang possession bisan kon nahuman na ang pagdeposito.
Dihay duha ka higayon niadtong Marso ug Abril sa 2017 nga naabtan na og 18 ka mga adlaw ang mga koleksyon nga nikabat na og P23,622,286.45 sa wala pa madeposito sa banko.
Nabantayan usab sa COA nga mga deposito naglakip sa private check ug dihay duha ka higayon diin ang municipal treasurer nagdeposito og mga check collections nga moabot og P406,406.46.
Sumala sa COA ang municipal treasurer dili na kinahanglan nga magpaabot sa pag-release sa mga check payment ngadto sa asosasyon sa mga mananagat ug dili i-encash ang ilang tseke kay ang nauwahi dunay kaugalingong bank account nga gi-maintain hinungdan nga responsibilidad niini ang pagdeposito sa kwarta sa ilang account.
Ikaduha, ang check kay payable sa asosasyon nga usa ka non-government organization ug ang encashment usa ka kalapasan sa mga lagda ug mga regulasyon nga gipatuman sa COA.