Lisod mohukom dayon

Makaalarma ang sunodsunod nga kaso sa patay sa Sugbo. Halos kada adlaw, pukawon kita sa duguong mga panghitabo. Unsa kahay nagpaluyo sa mga krimen? Personal nga motibo o binuhatan sa organisadong grupo? Dili kaha kabahin sa gubat sa kagamhanan batok sa negosyo sa gidiling drugas? Lisod ang pag-ambak dayon og hukom. Ang segurado nga dunay nahitabong patay ug kombinasyon sa komplikadong sitwasyon.

Pananglitan, dunay mga hungihung nga dunay kalabotan niini ang kampanya batok sa gidiling drugas sa kagamhanan. Apan ang ubang klaro usab nga personal ang motibo. Dili ba kaha internal nga bangi o away sa sindikato sa drugas apan gipahid lang sa kampanya sa kagamhanan? Mismo dunay nakalas nga kinabuhi sa mga awtotidad nga makalibog ang hinungdan. Gibawsan sa sindakato? o Miduwa kaha negosyo sa gidiling drugas busa giunay sa kauban sa serbisyo?

Sama sa ulahing kaso sa pagbanhig-patay sa ahente sa Philippine Drug Enforcement Agency (PDEA) 7 nga si Von Rian Tecson sa Baransay Perrelos, dakbayan sa Carcar niadtong Miyerkules sa hapon sa miaging semana. Nitumaw ang ngalan ni SPO1 Roderick Balili nga gidudahan nga usa sa mga suspek sa maong pagpamanhig human samdan kini nga nasulod sa pribadong ospital sa samang adlaw. Apan gihimanak sa Police Regional Office (PRO) 7 human giingong naaksidente sa pagbuto sa pusil sa lungsod sa Pinamungajan.

Ug patay na si SPO1 Balili. Nigawas sa mga taho nga usa ka sulundong amahan kini sa bugtong anak ug nagsuporta sa iyang mga ginikanan isip kamaguwangan sa napulo ka managsuon. Luoy usab ang iyang istorya. Walay dautang record sa ilang dapit ug isip pulis. Tinuod, makaalarma ang sunodsunod nga patay. Ang kadaghanan dunay iyang istorya. Mas luwas kita kon magpuyong yano ug matarong.

Lisod usab nga mohukom dayon sa matag hitabo.