Say you’ll stay
Miginhawa kog lawom kaayo. Unsa pa may akong mahimo? Nakahibawo na ang mga ginikanan ni Warren bahin sa among pagminahalay. Sooner or later, makahibawo sab ani sila si Mama ug Papa.
“Unsay atong buhaton ron, Ren? Miinom ko sa akong drinks kay mora mikalit paguga ang akong tutunlan.
“Magtaban ta, Ruby. Ipakita nato sa atong mga ginikanan nga dunay kalig-on ang atong paghigugmaay.” Nakapanglingo ko.
“Di na mao ang solusyon, Ren. Mosamot ka miserable ang atong kinabuhi ana. Nag-eskuwela pa ta ug parehas nga way trabaho. Unsay akong kaugmaon kon magtaban ta?” Naghinuktok si Warren. “Atubangon ta ning problemaha, Ren. Basta, way biyaay, ha?” “Promise, Ruby. Magpabilin ko nimo.”
Migakos ko sa akong boyfriend unya nangaon na mi. Every now and then magpahiyomay mi.
Naseguro ko na nga di mosunod si Warren sa kagustohan sa iyang mga ginikanan. Ug ako sab, nakaseguro na sa akong feeling ngadto niya nga true love gyud nako siya.
Pagka hapon, nagkuyog mi si Warren sa pagpauli. Gihatod ko niya hangtod sa among balay. Wa nay rason nga taguon pa namo ang among relasyon. Atubangon namo ang tagsa-tagsa namo ka mga ginikanan ug mobarog mi sa among gugma sa usag usa.
Hugot nga gikuptan ni Warren ang akong kamot samtang nanulod na mi sa sala.. Puwerte namong kuganga sa among nakita. Sila si Noy Teo, Nang Mely ug ang akong mga ginikanan malipayon kaayong nag-estoryahay samtang nanglingkod sa sopa sa sala. Nagkatinan-away mi si Warren.
“Maayo kay nia na mong duha, Warren ug Ruby. Maayo na ang among pagtinagdanay tungod ninyo.”
Nakagakos ko kang Warren sa akong nadungog gikan ni Noy Teo. “Mao na. Sukad karon, mag-uli na mi sa maayong kabubut-on.”
Malipayon si Papa nga mikidhat ngadto kang Mama. Nag-aper sab sila si Mama ug si Nang Mely.
Wa gyud mi magdahom si Warren nga ning among pagpauli karon, wa na diay problema nga among atubangon sa among paghigugmaay.
Hilom kong nakaingon nga ang gugma makamugna gyud diay og milagro. Aw, para namo ni Warren, usa ka milagro ang kalit nga pag-uliay sa maayong kabubut-on nila ni Mama, Papa ug sa mga ginikanan ni Warren.
(KATAPUSAN)