2 ka reg'l title fights sa Mandaue karong Sabado
Duha ka regional titles ang ilugan karong Sabado alang sa double-header sa usa ka boxing promotions diha sa Mandaue City Sports and Cultural Complex.
Ang wa pay pildi nga Christian Araneta mosuway sa katakos sa mas eksperiyensiyado nga si Jerry Tomongdan alang sa bakanting World Boxing Council (WBC) Asian Boxing Council Silver light flyweight crown, samtang ang laing undefeated nga si French Zaber Zayani makigsinukliay sa iyang mga kinumo batok ni Eduardo Mancito alang usab sa bakanting World Boxing Organization (WBO) Orinetal super featherweight belt.
Gawas sa kampiyonato tuyo usab sa 23-anyos nga Araneta nga mosaka og balik ang iyang ranking sa world human kini maus-os sanglit taodtaod kini nga wala makaaway tungod sa pagka-angol sa iyang abaga.
Ning bag-ohay lang, nagmalampuson ang iyang pagbalik ibabaw sa ring ug iyang gipamatuod nga hingpit nang naalim ang iyang angol pinaagi sa pag-knockout ni Ian Ligutan.
Si Tomongdan, 24, ang nakaaway na og mga boksidor nga adunay mga pangalan sa ilang division. Sa uwahi niyang away iyang gi-knockout si Donny Mabao.
Si Araneta adunay 15-0, 13KOs nga record samtang si Tomongdan mirehistro og 259-4, 13 knockouts nga baraha.
Sa ilang bahin, si Zayani limpiyo usab og record nga may 14 ka daog, walo ka knockout batok ni Mancito nga may 16-8-2, 9KOs.
Gawas sa duha ka main event fights, ang mga kulbahinam nga panagsangka sa preliminary ug supporting bouts maoy mokompleto sa promotion.