UC Webmasters third sa Kadayawan Invt’l

Nakabig sa University of Cebu Webmasters ang ikatulong puwesto human nila mabuntog niadtong Dominggo ang National University Bulldogs, 75-69, sa 2018 SBP-XI-Kadayawan Invitational basketball tournament sa Davao City Recreation Center.

Ang import nga si Frederick Elombi may naggiya sa Webmasters pinaagi sa iyang 22 puntos nga giabagan sa 12 ni John Jabello. Ilang naposte ang 45-35 nga labaw sa halftime ug gikan niini wala na nila buhii pa hangtod sa katapusang pagbagting sa buzzer.

Sa kadaugan, ang mga batos ni coach Raul “Yayoy” Alcoseba misakwat sa P40,000 cash sa upat ka adlaw nga torneyo nga nagsilbing kabahin sa kasaulogan sa Kadayawan sports festivities.

Si Issa Gaye nangulo sa Bulldogs nga may 14 puntos.

Ang pagsalmot sa Webmasters sa maong torneyo nasilbing tune up games usab kanila alang sa Cesafi 2018 nga sugdan karong Agusto 25.

Samtang sa laing bahin, ang Team Davao Go-Duterte maoy miguwagn kampiyon human nila pukana ang UST Growling Tigers sa finals, 94-90, aron pagbulsa sa P100,000 nga cash prize.

Ang langyaw nga si Leandry Sanjo mibabad og 22 puntos samtang si James Linares midugang og 16 alang sa Davaobased squad.

Sila si Presidential Adviser on Sports ug SBP-XI director Glenn Y. Escandor, tournament commissioner Atty. Francis Calatrava ug mga opisyal sa Davao City Sports Development Division maoy mi-award sa mga ganti.

TAMPO NGA HULAGWAY ■ THIRD PLACER. Ang kinatibuk-ang puwersa sa University of Cebu (UC) Webmasters nga milangkat sa ikatulong puwesto sa bag-o lang natapos nga Kadayawan Invitational Basketball Championships sa Davao City.