PULIS SA LAPU-LAPU NGA GIPATAY, GITULIS
Tulis ang nag-unang motibo nga gisubay sa Lapu-Lapu City Police Office sa pagpusil patay sa retiradong pulis sa dakbayan sa Lapu-Lapu kagahapon sa kaadlawon.
Nasuta sa imbestigasyon nga nagdala og sling bag si SPO2 Wilfredo “Willy” Amores, 56, taga Barangay Marigondon sa mao nga dakbayan nga dunay gibana-banang P5 milyunes ang sulod niini.
Gikatahong nakadaug kini sa casino ug gibayran usab sa mga nakautang kaniya isip pinanser.
Ang sling bag mao ray gikuha sa duha ka mga tawo nga nag-angkasay sa motorsiklo.
Matod ni Supt. Eloveo Marquez, hepe sa Investigation & Detection Management Branch, gitan-aw sa Task Group Willy robbery with homicide ang kaso.
Wa nila isalikway ang personal grudge ug love triangle.
Way impormasyon ang city police nga nalambigit sa illegal drugs si Amores, kinsa niretiro nidtong Marso 8, 2018 human sa 30 ka tuig nga panerbisyo.
Base sa impormasyon nga nakuha sa kapulisan, nagdala og dakong kantidad sa salapi si Amores niadtong higayona kay daogan sa casino sa Cebu Yacht Club sa Pusok.
“Nidaog ni siya gabii (Miyerkules). Nag-cash out kaganihang kadlawon (Huwebes) and then pag-uli niya, naay motor nagsunod sa iyaha,” dugang ni Marquez.
Magkanunayan si Amores sa casino kay usa sab kini ka financier nga mopautang og puhonan sa mga player.
Adunay nitumaw nga unconfirmed report base sa sulti sa mga nakaila ni Amores nga bag-o kining nakakolekta sa mga nakautang kaniya ug giingong moabot sa P5 milyones ang dala niini nga kuwarta.
Si Marquez, sa iyang bahin, nagkanayon nga wa nila isalikway ang personal grudge labot sa iyang negosyo isip financier.
Posible sab nga kontra o nakautang niya ug posible nga adunay nag-tip gikan sa sud (casino) aron siya atngan sa gawas,” saysay sa opisyal ngadto sa mga tigbalita.
Makita sa close circuit television (CCTV) footage sa city government nga gituparan ang nagdagan nga motorsiklo ni Amores diin aduna siyay angkas nga babaye.
Pagtungod sa motorsiklo sa riding-in-tandem, gipusil ang retiradong pulis.
Wa giapil ang babayeng angkas nga kawani sa casino nga igo lang nang-hitch og sakay kay sama ra sila og direksiyon.
Pagkahagba ni Amores sa may tiilan sa Marcelo Fernan Bridge, Barangay Pusok, ningkanaog ang duha ka gunmen ug gikuha ang gisalib-ay nga sling bag sa biktima dayon ning-U-turn.
Samad pinusilan sa ulo ug ubang bahin sa lawas ang naangkon ni Amores gamit ang .45 kalibre nga armas ug adunay upat ka basiyo nga bala nga nakuha sa crime scene.
Samtang si Senior Superintendent Limuel Obon nihulagway kang Amores nga kugihan ug dedicated sa iyang kanhi trabaho isip kanhi imbestigador sa Theft and Robbery Section.
Gani nakadawat siya og award sa dihang nagbinugtong og follow up sa kasong kawat sa may Barangay Pajo ug nakigduwelo pa sa mga suspek.