ABU SAYYAF NASIKOP
SA RAID SA CARCAR; MGA PUSIL, BALA, EXPLOSIVES NAKUHA
Tungod sa pag-alerto ug intelligence report sa langyaw nga nasod sa hulga sa terorismo dinhi sa Sugbo nga ilang gipadangat sa Malacanang, nadakpan sa kapulisan ug kasundaluhan ang usa ka gidudahang sakop sa Abu Sayyaf kagahapon sa kaadlawon sa Barangay Ocana, dakbayan sa Carcar.
Kini taliwa sa panghimakak sa kapulisan nga dunay hulga sa terorismo dinhi sa Sugbo karon, sama sa ilang gibuhat niadtong wa pa moulbo ang engkwentro tali sa kasundaluhan, kapulisan ug Abu Sayyaf sa Bohol.
Nadakpan sa Criminal Investigation and Detection Group (CIDG) 7 ug kasundaluhan si Oger Roma Pelonio, 68, alyas Aktoy ug Juncal, sa giabangang balay niini sa Carcar alas 3 kagahapon sa kaadlawon.
Nakuhaan siya og usa ka Colt .45 caliber pistol ug mga bala; usa ka 9mm Ingram ug mga magazine ug bala; kalibre .38 nga revolver, C4 TNT nga usa ka eksplusibo, duha ka rifle grenades, usa ka granada, usa ka Qur-an , kawo, walo ka printed aerial maps, printed
bomb sketch ug siyam ka nag- kadaiyang cellular phone nga managlahi ang brand.
Gawas nga gitumbok siyang sakop sa teroristang grupo, giingon nga lider usab siya sa sindikato sa gun smuggling ug extortion.
Ilang mga biktima ang mga pribado ug gobyernong mga buhatan sa Kabisay-an ug Mindanao.
Ang mga sakop sa CIDG 7 inabagan sa Regional Intelligence Division 7, National Intelligence Coordinating Agency ug Intelligence Service of the Armed Forces of the Philippines (ISAFP) Central Command, armado og search warrant nga giluwatan ni Judge Gilbert Moises sa Regional Trial Court (RTC) Branch 18 sa siyudad sa Sugbo.
Pasado alas 3 gahapon sa kaadlawon ilang gisulod ang giabangang balay ni Pelonio.
Matod ni Col. Medel Aguilar, information officer sa Centcom, nga human sa nahitabong bombing sa Lamitan Basilan duha ka semana na ang nakalabay, ilang gipahugtan ang pag monitor sa Sugbo.
“The mere fact that the some firearms were recovered from his possession and a suspected explosive, that should be enough to implement the warrant,” matod ni Aguilar. Usa ka kasaligang tinubdan sa Police Regional Office 7 nitug-an sa Superbalita Cebu nga milutaw ang ngalan ni Pelonio human usa ka terorista ang nadakpan sa United Kingdom.
Nitug-an matod pa kini nga molusad ang ASG og mga pagpangatake sa Mindanao ug Visayas diin si Pelonio ang
contact sa ilang grupo dinhi sa Central Visayas.
Ang UK nipahibawo sa kagamhanan sa Pilipinas nga mao usay nialerto gilayon sa Centcom.
Matod sa tinubdan nga ang ngan ni Pelonia nitumaw sa mga
intelligence agency sa nasod. Apan giklaro ni Aguilar nga wala pay hingpit nga hulga nga nadawat ang Centcom.
DI ABU SAYYAF?
Hugot nga gihimakak ni Pelonio nga usa siya ka sakop sa Abu Sayyaf sanglit Kristyano nga kanhi nagpuyo sa Sultan Kudarat.
Ang mga armas ug ekslusibo nga nakuha sa sulod sa iyang giabangang lawak iyang gihimakak nga iyaha.
Siya nagtuo nga ang nanag iya niini tag-iya sa balay nga usa ka retiradong pulis, kinsang ngan gipugngan una sa Superbalita Cebu.
“Nahibalo ko nga naay armas diha pero dili manghilabot kay tag-iya sa balay diha retired. Nganong Abu Sayyaf man ko? Tigulang nako oi. Maglisod man gani kog tindog kay daghan na kog sakit, naa koy arthritis sa tuhod, kamot tiil ug liog,” matod ni Pelonio. /