Pinoy Care mikiha sa maestro
Reklamong libel o kalapasan sa Article 355 sa Revised Penal Code ang gipasaka sa Pinoy Care Visa Center, Inc. ngadto sa piskaliya batok sa usa ka maestro nga nireklamo batok niini sa National Bureau of Investigation sa miaging adlaw.
“Because I’m really mad at him, I’m really angry for maligning the name of the company for whatever motive he has. And this should serve as a lesson for others to not just destroy Pinoy Care just because they want to,” padayag ni Prisca Niña Mabatid, chief executive officer ug presidente sa Pinoy Care. Dugang mga reklamong damages ug breach of contract ang ilang ipasaka sa mosunod nga mga adlaw batok ni Levi Cortez.
Apan matod niya nga kon mag-public apology kini, bakwion nila ang reklamong kriminal nga ilang gisang-at sa Cebu City Prosecutors Office batok niini.
Siya namahayag way katungod si Cortez nga dauton ang iyang kredibilidad ug reputasyon sa Pinoy Care nga iyang giampingan ug legal nga nag-operate sud sa 18 na ka tuig.
Siya nagtuo nga ang iyang mga kaatbang sa pulitika ang nagpaluyo niini.
Si Mabatid nipasabot nga kon makapasar lang sa International English Language Testing System (IELTS) mapadayon nila ang aplikasyon ni Cortez ug maduso ngadto sa Canadian Embassy.
Matod niya, ang pagpasar sa IELTS ang usa sa mahinungdanong mga rekisitos sa pagkuha og immigrant visa sa Canada diin nang-apply ang maestro.
Si Mabatid nidugang nga kaduha mokuha og IELTS si Cortez ug kaduha usab kini wa makapasar.
Sumala niya, mismo ang maestro niangkon nga kuwang kini sa iyang mga rekisitos hinungdan nga wala pa makalarga sa Canada hangtod karon.
Siya nikwestyon kon nganong nireklamo pa sa NBI ang maestro nga mahimo unta kini moadto sa ilang buhatan nga naa nahimutang sa ikalimang andana sa CFI buiding. “If he feels really that he is agrabiyado jud siya and if he
feels nga wala nagtrabaho ang Pinoy Care sa iyahang mga papeles, then he can file a case
against Pinoy Care,” dugang sa kapitan sa Barangay Mabolo, siyudad sa Sugbo.