Mga tinun-an gitudloan bahin sa traffic rules

Mga tinun-an sa Lipata Central School sa lungsod sa Minglanilla gitudlo-an sa basic traffic rules and signs aron paglikay sa disgrasya diha sa kadalanan.

Gipili sa Kapitolyo nga ilusad ang Sugbo Likay Disgrasya (SULID) Traffic Summit sa Minglanilla human matumbok ang unang distrito nga maoy dunay dakong problema sa trapiko.

Gawas sa naandan nga curriculum ug subject sa eskwelahan, buot sa Kapitolyo nga makat-on ang mga tinun-an sa basic nga mga lagda sa trapiko, lakip na sa traffic signs.

Ang focal person on traffic management sa Kapitolyo Joy Tumulak ug ang mga tinugyanan sa Provincial Disaster Risk Reduction and Management Office (PDRRMO) ug Provincial Information Office nagtinabangay aron pagtudlo sa mga bata labot niini.

Ang kabataan gihulagway ni Tumulak nga risgo kaayo sa mga disgrasya sa kadalanan, ilabi na kon nagtungha sila sa mga eskwelahan daplin sa highway.

Susamang traffic summit ang ipahigayon sa siyudad sa Mandaue.

Apan matod sa chairman sa Committee on Education sa Hunta Probinsiyal Bokal Christopher Baricuatro, dili nila i-limit ngadto sa mga skwelahan sa urban areas ang kalihukan.

Matod niya, moabot ang panahon nga ang mga tinunan sa rural areas manimpalad sa siyudad ug kinahanglang dunay igong kahibalo sa traffic rules ug regulaitons.

Nagtuo sab siya nga moabot ang panahon nga masinati na usab sa mga rural area ang traffic.

Gawas sa mga school supply, plano sa provincial government nga manghatag usab og mga traffic information materials sa tinun-an.