Way gahom?

Ubos sa Republic Act 6975 kun Department of the Interior and Local Government Act of 1990, ang mga mayor sa siyudad ug lungsod dunay gahom sa pagdumala ug pagkontrolar sa kapulisan. Ang terminong operational supervision and control nagpasabot nga duna siyay gahom sa pagmando, pagdumala sa kapulisan sulod sa iyang jurisdiction.

Busa unta, di na angay pang makig-away si Cebu City Mayor Tomas Osmena sa kapulisan kay duna siyay gahom ubos sa balaud kay gibalik na man kaha kaniya ang gahom sa pagdumala nga gikuha kaniadto sa National Police Commission (Napolcom).

Hinuon, sukad sa pagdumala ni Presidente Rodrigo Duterte, wa siya makapili sa unsay iyang gusto nga mamahimong hepe ug gikuhaan pa siyag makadiyot sa gahom.

Tinuod, gibalik na ngadto kaniya ang gahom sumala sa papel, apan kon tan-awon ang sitwasyon karon, di nimo kini makita.

Iyang gipasanginlan ang kapulisan nga maoy nagpasiugda sa high profile nga pagpamatay ug sa pakyas nga pagpatay sa iyang kaalyadong si Tejero barangay konsehal Jessielou Cadungog.

Bisan unsa na lang ang mga alegasyon nga gipahid ni Osmena ngadto sa kapulisan kay kuno, dunay nagsulti kaniya nga dunay mga hitman nga nangabot, nga naglakip og pulis.

Mao nang si bisan kinsa makapangutana, sa tinud-anay, gibalik ba gyud kaha ngadto kaniya ang deputation aron modumala sa kapulisan? Duna pa ba siyay operational control kanila, nga bisan ang hepe sa CCPO nga si Senior Superintendent Royina Garma niingon nga wa siya mahadlok sa mayor?

Sa katuigan nga nanglabay, sayon ra ni Osmena pagpakita sa iyang gahom. Apan karon ingon sa grabeng pagkabali na sa panahon. Sa sige niyang pika sa kapulisan, sama ra siya nga maoy nagtiyabaw.