Sadsad Festival sa Poblacion, Oslob sa Dominggo
Nakakita na ko ani nila sa una. Maora-ora gyud og mga dagway sa orihinal. Puparehas pod og mga tingog.
Ang nakanindot aning grupoha kay wa gyud magpakaaron ingnon nga mao ang orihinal. Kopya lang sila. Mao ni ang Bootleg Beatles.
Ang nindot nga balita kay mobalik kini sa Cebu karong Sept. 8. Sa IEC ang ilang pasundayag.
○○○
Kadaghan na ko makadungog sa mga pagdayeg sa jingle sa Sadsad Festival sa Poblacion, Oslob kay lagi makadani gyud sa pagsayaw. Si Manny Lapingcao ang nihimo niini dihang akong giduol aron pagtuman sa hangyo ni kanhi Poblacion Barangay Captain Emelito ‘Tata’ Abines nga mangitag kompositor.
Karong Dominggo, moki-at na usab ang mga lumulupyo sa pito ka mga purok sa barangay sa pagsayaw dungan sa tugtog sa Sadsad Jingle isip usa sa mga highlights sa pista ni Señor San Roque.
Viva Señor San Roque! Viva! Sadsad!
○ ○ ○
Sa among pakigkukabildo sa mga bida sa Pinay Beauty (She’s No White), nakadayeg ko sa Cebuanang si Chai Fonacier kay iya gyud kunong gipanghambog sa iyang mga kauban nga lahi ra gyud kon mangutana ang media sa Cebu.
Di baya ni ang unang higayon nga nakadungog ko ini pero nindot gihapon paminawon ug makalapad sa atay. Mas makapakutaw kuno sa utok sa mga artista ug di liko ang mga pangutana sa taga Cebu media.
Salamat sa pagdayeg, Chai. Sa akong pagsabot, si Chai ang labing bida sa pelikula, mao pa gani ang naa sa title role. Maayo man gyud moarte si Chai mao nga paborito siya labina sa mga indie films.
Niadtong Miyerkules, mao pay pagkakita nako sa bag-ong teleserye nga Halik ug didto nako nahibaw-an nga apil diay si Chai dinhi. Padayon, paisana!
○ ○ ○
Gipasabot sa mga artista nga bahin sa pagmahal sa kaugalingon ingon man pagdawat ug pagpasalamat sa mga gihatag sa Ginoo kanato ang tema sa Pinay Beauty.
Lahi sa Dedma Walking nga super bayot ang papel ni Edgar Allan Guzman, usa ka mapinanggaong hinigugma ni Chai ang iyang papel ug nga mobuhat kini sa iyang mahimo aron lang pagpabati sa iyang gugma ngadto sa babaye.
Managsamang insecure si Maxine Medina ug Chai sa kolor sa ilang panit kaniadto pero nadawat ra nila ngadtongadto ug gani giisip kini nilang alas nga ikapasigarbo.
Tomboy ang papel ni Hannah Ledesma dinhi ug nalingaw siya kay lahi kini sa mga sosyal ug maldita nga papel nga iya nang nadala. Apil sa Pista ng Pelikulang Pilipino ang Pinay Beuty.