You took my heart away
Nahasol gyud ko, uy! Hapit man gani nagbuntag nga wa koy tarong nga katulog. Way laing nasulod sa akong hunahuna, sila ra gyud si Jeepryl ug Marlene. Kaayo na gyung ihilak. Apan nganong naingon man ko ani? Wa ba gyud koy pagsalig sa akong kaugalingon? Nganong di ko man hatagan og one hundred one percent nga trust ang akong boyfriend?
“Ayaw dayon paghatag og di maayong konklusyon anang bahina, uy, Clarissa.”
Midangop ko kang Teresa nga suod kong amiga ug klasmet sab nako. Gisumbong ko niya ang akong problema.
“Sa pagkatinuod lang, Clarissa, ikaw ra gyuy naghatag og problema sa imong kaugalingon. Di man na problema, uy. Advance lang gyud ang imong hunahuna. Mihatag dayon kag daotang hunahuna bahin nilang Jeepryl ug Marlene.”
Nakapangagho na lang ko. Diha mi si Teresa sa school canteen niadtong tungora.
“Di man gyud nako kalikayan nga mangabubho ko, Teresa. Wa man gud magkabuwag sila si Jeepryl ug Marlene.”
“Ibutang nato nga wa sila magbuwag. Pero nakaseguro ka ba diay nga love gihapon nila ang usag usa hangtod karon? Who knows nga duna na say uyab si Marlene nga laing laki?”
Nahilom ko. Husto man sab tingali si Teresa, hilom kong nakaingon. Ako ra gyud tingali ang naghatag og kahasol ug problema sa akong kaugalingon.
“Kon tinuod mong love si Jeepryl, salig niya, Clar. Ayaw ipakita ug ipabatyag niya nga wa kay pagsalig niya. Na, ikaw lang. Basig mawa’a ang gugma ni Jeepryl nimo. Kon wa kay pagsalig niya, siyempre makaingon siya nga wa ka say gugma niya.”
Kalit kong gikulbaan. Nahadlok na nuon ko sa giingon ni Teresa. Na, sakitan gyud ko kon biyaan ni Jeepryl. Husto gyud si Teresa, ipakita ko kang Jeepryl nga true love ang akong feeling niya pinaagi sa pagpakita niya nga dako gyud ang akong pagsalig niya.
Miyangu-yango ko. Unya naka-smile ko kang Teresa. Mipahiyom sab ang akong amiga ug nakig-aper siya nako.
Dihang nagkita mi si Jeepryl usa ka hapon ug nag-esnak mi sa Goldilocks, gipakita ko niya nga malipayon ko sa among panag-uban. Di maayo nga makita niya nga nagmagul-anon ko. Makaingon unya siya nga wa koy ganang nakigkuyog niya. Di kini maayo para sa among relasyon. (SUMPAYAN)