SISTERS OF MARY GUEST SA CESAFI

Giaprobahan sa Cebu Schools Athletic Foundation, Inc (Cesafi) board nga mamahimong guest team sa nagkalainlaing event ang Sisters of Mary School (SMS) Boys Town Aloysians sa karong umaabot nga season.

Niini nagpanikad na ang Minglanilla-based school nga mosalmot sa 12-under basketball, secondary football, table tennis, athletics, volleyball ug swimming.

““So far the training of the athletes has been continuous since the Cebu Provincial Sports Commission started to support us,” matod ni Mark Allan Cantal, ang sports coordinator sa maong tunghaan.

Kon kahinumdoman, niadtong Hunyo giaprobahan sa Cesafi board ang partisipasyon sa SMS Boystown sa 12-under basketball, ug ning bag-ohay lang ila na usab nga gipahibawo nga mahimo na usab kining mosalmot sa ubang events.

Matod ni Cantal nga nalipay kaayo ang ilang mga bata sa dihang ilang nahibaw-an nga makaapil na usab sila sa ubang mga events.

Hinuon giangkon ni Cantal nga wa pa gyud sila makasabot kalabot sa bag-ong sports nga masalmotan apan positibo siya nga makahimo sila niini sanglit aduna silay 2,000 ka mga studiyante gikan sa Grade 7 ngadto na sa Grade 12.

“When we join in tournament we will usually have tryouts because there are a lot of athletes. Unfair man pud if mag selection raka niya walay tryout. At least all the athletes will have the chance,” dugang ni Cantal.

Giingon ni Cantal nga ang ilang mga atleta adlaw-adlaw nga mag-training tungod kay mosalmot usab sila sa 2018 Milo Little Olympics Visayas Regional Finals karong Agusto 30 ngadto sa Sept. 2.

Si Van Halen Parmis, ang Cebu Province and Boystown basketball coach, nagkanayon nga gitutokan nila og maayo karon ang under-12 basketball team alang sa Cesafi.