Siguridad ni Cadungog

Gi-dismissed sa panel of prosecutors sa Provincial Prosecutor’s Office ang kasong murder ug frustrated murder batok ni Tejero barangay councilor Jessielou ‘Jingjing’ Cadungog nga gipasaka sa kapulisan batok kaniya ug sa iyang driver-bodyguard, William Macaslang. Hinuon, gipasaka ang kasong homicide batok kang Macaslang, kinsa niangkon nga maoy nakapusil-patay sa usa ka pulis nga si PO3 Eugene Calumba.

Ang kapulisan mipasaka og kaso batok nila ni Cadungog ug Macaslang nunot sa kamatayon ni Calumba ug sa pagsuway pagpatay usab sa kauban ni niini nga si Michael Banua, kinsa gi-ingon nga nagpahigayon og surveillance. Apan si Macaslang nangankon usab nga si Calumba ang gustong mopusil kaniya mao nga iya kining gi-unhan. Ang kapulisan mi-insister nga diha si Cadungog sulod sa iyang sakyanan atol sa maong hitabo.

Si Banua ug usa ka menor de edad ang gihimong saksi sa kapulisan. Apan ang mga testimonya sa maong mga saksi wala hatagi og bili sa piskaliya. Mas gituhuan ang mga testimonya nila ni Cadungog ug Macaslang. Ang National Bureau of Investigation (NBI 7) mipasaka usab og kaso batok ni Macaslang. Wala giapil si Cadungog. Bisan tuod og ang depensa ni Macaslang nga ‘he was acting in self-defense’. Apan gikinahanglan gihapon kini nga husayon sa korte aron mapamatud-an kon balido ba ang iyang depensa.

So, gawasnon na si Cadungog gawas kon adunay laing rason nga magpadayon ang iyang detention sa NBI. Apan ang dakong panguta karon kon ‘safe’ ba ang iyang kaugalingon karon labi pa kay gibutyag sa kapulisan nga usa siya sa mga drug personality? Dili kaha mameligro ang iyang kinabuhi labi pa kay gidudahan nga ang kapulisan maoy nagpaluyo aning serye sa mga pagpamatay dinhi sa Metro Cebu labi pa kadtong mga nahilambigit sa kalihukan sa illegal nga drugas bisan niadtong mga tinugyanan sa balaod.

Ang kapulisan mi-insister nga diha si Cadungog sulod sa iyang sakyanan atol sa maong hitabo.