You took my heart away
Gihatagan ko nag kalinaw ang akong kaugalingon. Duna nay assurance gikan kang Marlene nga di siya intresado nga magkauli sila si Jeepryl. Nanghinaot pa man gani siya nga mo-prosper ang among relationship ni Jeepryl.
Nagmalipayon na ko sa among pagminahalay ni Jeepryl. Nawala na ang insecurities nga kanunay kong gibati nga maghunahuna aning pagpauli ni Marlene sa Cebu. Tingali, nahunahuna ni Marlene nga di sila para sa usag usa si Jeepryl, ug wa siyay tinguha nga bungkagon ang among relasyon ni Jeepryl.
“Unsa na, Clarissa? Di ba giingnan man tika nga ayaw dayon paghatag og di maayong konklusyon ning pagpauli ni Marlene sa Cebu? Di gyud ka angay nga ma-insecure niya kay ikaw man ang girlfriend ni Jeepryl sa pagka karon. Ang relationship nila ni Jeepryl ug Marlene kaniadto ra to. Nahanaw na kini sa pag-adto ni Marlene sa London. Ikaw na ang love ni Jeepryl karon.”
Nag-smile si Teresa samtang nangaon mi sa among lunch sa suki namong karenderya. Gitug-anan ko siya sa tanan. Miyangu-yango ko. Gipakita ko kang Teresa nga duna na koy pagsalig kang Jeepryl, ug labaw na sa akong kaugalingon.
“Bitaw, uy. Daotan lang gyud kog hunahuna.”
Nakig-aper ko sa akong amiga.
Para nako, wa na gyud koy angay kabalak-an. Ako gyud ang love ni Jeepryl. Husto si Teresa. Ang pagminahalay nila ni Jeepryl ug Marlene milabay na, kaniadto ra to. Ang karon maoy angay kong hunahunaon. Ug ako ang girlfriend ni Jeepryl karon.
Usa ka hapon nga gikan ko sa eskuwelahan, nagkakita mi si Teresa sa downtown. Iya kong giimbetar og panihapon kay birthday niya. Aw, misugot ko. Wa ko modiretso sa pagpauli. Usa ka fast food ang among gidulong ni Teresa. “Happy birthday, friend.” “Thank you, friend.” Nagpahiyomay mi si Teresa. Apan ang gibati kong kalipay kalit nga nawala dihang mosulod na unta mi sa kan-anan. Kinsay di makalitan? Didto sa sulod, nakita ko sila si Jeepryl ug Marlene nga malipayon kaayong nangaon. Mora kog gipatay niadtong tungora. Morag wa ko makaginhawa. Mitan-aw ko kang Teresa. Nakalitan sab siya kay nakakita man siya sa duha, nga sweet kaayo.
Naghinungitay pa sila sa pagkaon.
(TAPUSON SUNOD GULA)