Ang laing kauhaw ni Jojo
Naglagiting ang kainit sa adlaw sa Biyernes Santo sa tibuok kalikupan. Samtang gipasarap ni Jojo ang iyang panan-aw sa kasilinganang mga balay ug samtang nagtindog siya sa balkonahe sa ikaduhang andana ning ilang dakong balay nga iyang napatukod sa ilang baryo, nabatyagan niya nga gibati siya og talagsaong kauhaw sa kaugalingon. Lahi nga matang sa kauhaw ang iyang gibati karon. Daghan nang Semana Santa ug Biyernes Santo nga nanglabay sa iyang kinabuhi, apan karon lang siya makabatyag ning talagsaong kauhaw.
Nakapangagho si Jojo nga hinayng milingkod sa gamyng sopa nga diha sa atubangan sa gamay ug lingin nga bildong lamesa. Miirag siya sa hunolunol nga sopa. Unya nabati niya ning udtoha sa Biyernes Santo ang lanog nga sound system sa simbahan sa ilang baryo, diin gipahigayon ang Siete Palabras. Naandan na nga ang mga parokyano sa ilang simbahan magpahigayon gayud sa tulumanon sa pagpamalandong sa katapusang pito ka pulong nga gilitok ni Hesukristo sa krus sa dayon na niyang kamatay sa krus. Ang kura paruko sa ilang lungsod imbitado isip usa ka mamumulong.
“Giuhaw ako!” misulod sa pandungog ni Jojo ang ikalimang pulong nga gilitok ni Hesus samtang naghingutas na siya sa krus. Gipaambit kini sa usa ka mamumulong nga maoy gipabatbat sa maong pulong. Naanod ug natandog ang balatian ni Jojo samtang naminaw sa nagbatbat.
Kon giuhaw man ang atong Ginuo aron ang mga makasasala magbag-o sa ilang kinabuhi ug mobalik sa iyang sabakan, way katarungan nga dili mobati og kauhaw ang tawo aron mahiusa sa atong Ginuo. Mitidlom kini sa alimpatakan ni Jojo. Tinuod nga giuhaw karon siya... dili kauhaw sa gugma sa usa ka babaye tungod kay natagbaw na siya sa daghang mga babaye nga iyang gikadulog sa kama. Usa siya ka civil engineer ug nagpabiling ulitawo sa edad nga 45. Haruhay ang iyang kinabuhi ug may luhong sakyanan nga mahalon.
Nakaamgo karon si Jojo ug natugkad niya nga gibati karon siyag kauhaw sa gugma, duha ka matang sa gugma: ang gugma sa Ginuong Hesus ug ang gugma sa isigka tawo. Nakapanglingo siya. Tinuod gayud nga dugay na siyang nahilayo sa Ginuo. Dugay nang panahon nga wala na siya makasulod sa simbahan aron motambong sa misa. Nakalimot na siya sa pagdayeg ug pagpasalamat sa Ginuo sa kaharuhay nga iyang natagamtaman karon. Ug nahilayo usab siya sa mga kasingkasing sa iyang mga silingan kay maoy mipatigbabaw ang iyang dako ug taas nga garbo ngadto kanila. Nahimo siyang mapahitas-on ngadto sa iyang isigka ingon ug wa magpakabana sa pagtabang sa mga problema sa mga silingan nga nagkinahanglan sa iyang panabang. Misulod sa iyang kaisipan ang pagbag-o.
“Diyos ko, giuhaw ako!” hilom nga mituaw si Jojo. “Isaad ko nga bisbisan ko na ang akong dakong gugma kanimo pinaagi sa pagsunod sa imong kasugoan. Ipakita ko usab ang dako kong gugma sa akong mga silingan ug isigka tawo. Tabangan ko sila sa ilang mga problema aron di na ko mobati’g kauhaw sa akong pag-alagad kanimo, dili lamang atol sa Biyernes Santo kundili hangtod na sa kahangturan!” Ug unya nabatyagan niya nga kalit miluag ang iyang dughan sa nakab-ot niyang hukom sa pagbag-o sa iyang kaugalingon.
(KATAPUSAN)