NLEX, MERALCO 2-0 MAOY TUYO
Mga duwa karon
4:30 pm- NLEX batok NorthPort
6:45 pm- Talk N’ Text batok Meralco
Langkaton og suway sa magsuong teams NLEX Road Warriors ug Meralco Bolts ang ilang ikaduhang sunodsunod nga kadaugan sa samang gidaghanon nga mga duwa sa ilang pagpakigbatok og lainlaing kontra sugod karong hapon sa Philippine Basketball As- sociation (PBA) Governor’s Cup conference sa Ynares Center sa Antipolo City.
Ang Road Warriors makigkontra sa NorthPort Batang Pier (kanhi GlobalPort) sa premirong duwa samtang makigsangka ang Bolts batok sa laing igsuong puwersa niini nga mao ang Talk N’ Text KaTropa sa main game.
Sa pagpangulo sa ilang impresibong imports, ang Road Warriors ug Bolts nasubhan og kadaugan batok sa ilang tagsatagsa ka kontra niadtong Biyernes atol sa pagsugod sa komperensya.
Gipakuratan sa Road Warriors ang Talk N’ Text, 103-90, samtang gipangbuntog sa Bolts ang Columbian Dyip, 109-106.
Ang import sa Road Warriors nga si Olu Ashaoulu nagpakatap og 33 puntos ug 23 rebounds aron pangulohan ang ilang kadaugan batok sa KaTropa.
Iya kining nahimo bisan aduna siya’y gipamating sakit sa iyang tuhod nga nasinati niya atol sa usa ka tune-up game batok sa Meralco mga duha na ka semana ang nakalabay. Sa iyang gipakitang determinasyon, nakakuha og dakong pagdayeg si Ashaoulu.
Gibutyag ni NLEX interim coach Jojo Lastimosa nga nagplano na unta silang mokuha og laing import aron ihulip kang Ashaoulu dihang naangol kini apan miinsister ang Nigerian-American import nga mokombati gihapon siya’g maayo.
“I’ll try to keep playing as long as I can,” matod ni Ashaoulu sa interbyu sa PBA.PH.
“I don’t wanna stop playing but obviously I gotta take care of my knee for my future. But I’m here to do a job so we’ll figure it out.”
Si Lastimosa, kinsa maoy temporaryong mihulip kang coach Yeng Guiao kinsa maoy naggiya sa Gilas Pilipinas sa kasamtangang nagpadayon nga Asian Games sa Indonesia, grabe nakadayeg sa determinasyon ni Ashaoulu.
“(His injury is) something that you really have to worry about because it can completely tear so that’s a problem. But you can see that he was allout,” matod ni Lastimosa.
Gipasabot ni Lastimosa nga mismong si Ashaoulu nanamilit na sa iyang mga kauban gumikan kay sayod kini kon unsa ka delikado ang angol sa tuhod apan misaad kining motbang sa Road Warriors hangtod sa iyang makaya.
“He had 33 and 23 with a half a leg not functioning, so you can see he really wanted to win that game for the players because it could be his last game. He actually said goodbye to the players,” dugang ni Lastimosa.
“But since we haven’t found a replacement yet, sabi niya, ‘I’m going to step in and do what I can.’”
Gawas kang Ashaoulu, si Lastimosa nakadayeg sab ilang bag-ong mga magduduwa hilabi na sa Sugbuanong si Mark Jayvenn Tallo, kinsa nitampo og 16 puntos sa ilang kadaugan batok sa Talk N’ Text.
Ang laing bag-ong mga sakop sa Road Warriors nga sila si Bong Galanza ug Philip Paniamogan nagkumboya og 20 puntos samtang nitunol og 14 puntos ang beteranong si Larry Fonacier.