PEKE NGA PARI NASIKOP
Nasikop sa entrapment operation sa mga sakop sa National Bureau of Investigation (NBI) 7 ang usa ka nagpailang missionary
priest gikan sa Bohol tungod usab sa pagtinir og peke nga mga driver’s license.
Ang nasikop mao si Guillermo Leonardo Olaivar nga taga-lungsod sa Duero, lalawigan sa Bohol, ug sakop sa The Marian Movement of Priests.
Nasikop siya sud sa usa ka mall sa downtown area human makuha gikan niya ang di mominus 33 ka mga peke nga driver’s license.
Gihimakak ni Olaivar ang alegasyon batok kaniya ug nisumbalik pagpamasangil nga igo lang siyang gitunolan sa usa ka ginganlan og “Janjan” aron dalhon ang pinutos nga mga dokumento sud sa mall.
Gidawat niya ang mga butang gikan sa wala ni mailhi nga tawo ug human niini, gisikop na dayon siya sa mga taga-NBI pasado alas 11 kagahapon sa buntag.
Gitug-an ni NBI 7 supervising agent Wenceslao Galendez, Jr., nga mismo ang Land Transportation Office (LTO) maoy nagpatabang kanila aron mapakgang ang ilegal nga binuhatan ni Olaivar.
Matod pa nga pasaligan niini ang iyang mga kliyente nga makaangkon og lisensiya kay anaa man siya sa LTO.
Si Olaivar usa diay ka retiradong sakop sa LTO sa wa pa matod pa nisud sa pagka-pari niadtong 2015.
Duna siyay asawa ug upat ka mga anak kay matod pa, di man Katoliko ang ilang grupo ug nisunod matod pa kini sa Eastern practice.
Apan nasayran nga ang The Marian Movement of Priests nga giingong grupo ni Olaivar, usa diay ka pribadong asosasyon sa Katoliko nga mga pari ug mga layko nga natukod sa Italia niadtong 1972.
Dugang ni Galendez nga gawas sa LTO, duna say nireklamo sa NBI batok kang Olaivar.
Dugang ni Galendez nga gihikay na sa ahensiya ang kasong possession of falsified documents aron maoy isangat batok sa dinakpan.
Makita ug maklaro nga peke ang nagpakaron-ingnon nga pari nga si Guillermo Leonardo Olaivar Jr., tungod kay kon tan-awon nimo ang ID niini, hinimo kini ug di ang opisyal nga identification sa mga pari nga gitawag nga Celebret.
FAKE DIAY?
Base sa ID ni Olaivar, nakita na daan ang sayop tungod kay Marian Movement of Priest ra ang nakabutang niini samtang ang MMP, plural kini o priests.
“Murag dili ni siya tinuod nga pari kay ang iyang celebret (i.d. sa mga pari) nakabutang: “marian movement of priest” -- singular. it should be plural - “Marian Movement of PRIESTS,”
pasabot ni Fr. Felmar Fiel, SVD.
“Based sa iyang ID he’s not from Talibon nor Tagbilaran or anywhere diri sa Pilipinas,” pag-uyon usab ni Fr. Jonathan Rubin, parochial vicar sa Cebu Metropolitan Cathedral.
Base usab sa official website sa MMP nga wa ang pangan ni Olaivar sa 10 ka mga MMP Priests nga responsable sa nasod.
Anaa lang ang mga pangan nila ni Rev. Fr. Mendoza; Rev. Fr. Charlie Pras, OMI; Rev. Fr. Guerrero, SJ; Rev. Fr. Clarence Bertelmann; Rev. Msgr. (Gen.) Castillo; Rev. Fr. Antonio Olaguer; Rev. Msgr. Francisco Tantoco; Rev. Fr. Romerico “Omer” Prieto; Rev. Msgr. Cesar Salomon; ug Rev. Msgr. Cesar B. Pagulayan.
“Ang MMP is an association of Catholic clergy and lay associate members. Meaning, ang ilang mga members gikan sa mga clergies gikan sa mga dioceses ug congregations. thus, kung naa man siyay celebret, it should not be from MMP but from the diocese kung asa siya gikan,” dugang pagpasabot ni Fiel.