PRO 7 wa mosalikway nga daghang pulis adik

Wa gihimakak sa Police Regional Office 7 nga daghang pulis sa Sugbo nga adik base sa pamahayag ni Presidente Rodrigo Duterte.

Atol sa pagtambong ni Duterte sa tigom League of Municipalities of the Philippines Visayas Cluster sa syudad sa Sugbo sa milabayng gabii, gipahibawo sa publiko nga daghang pulis sa Sugbo ang adik.

Tungod sa maong pamahayag, moimbestigar ang PRO7 kon kinsa kining mga pulis nga naggamitan sa ilegal nga drugas nga gipasabot sa Presidente.

Nagtuo si PRO 7 Director Debold Sinas nga adunay kasayuran ang pangulo pinaagi sa iyang kaugalingong network nga wa nila mahibaw-i.

Aduna siyay gipangdudahan nga badlungong mga pulis nga tiggamitan sa illegal nga drugas. Naa kini na sa ilang listahan ug target sa ilang kinalit nga drug test.

Matod ni Sinas nga sukad siya milingkod isip hepe sa kapulisan sa rehiyon 7, wa siyay hunong sa pagpahigayon sa kinalit nga drug test.

Ubay-ubay na ang nag positibo nga nag atubang na og kaso sa Regional Internal Affairs Service.

“We are checking katong mga gi-investigate, katong mga directly involve para ma check nato because katong comment ni President is very alarming for us. We will not justify it, we will investigate it,”

matod ni Sinas. Ang hepe sa Talisay City police station Supt. Marlu Conag niangkon nga matawag na nga hotbed ang ilang lugar sa illegal nga drugas tungod sa kadaghan sa mga barangay nga apektado usa niini ang Tangke nga giingong gikan sa Marawi ang supply.

Human sila ginganlan ni Duterte, nibulontaryo si Conag nga magpa drug test bisan kon niadtong milabayng buwan gihimo na niya kini ug nagnegatibo silang tanan sa police station.

/ ALAN TANGCAWAN ■ GISUGAT: Sila si (gikan sa wala) Presidential Spokesman Harry Roque, Presidente Rodrigo Duterte ug Special Assistant to the President Bong Go misugat kang Samboan Mayor Emerito Calderon human kini nauwahi sa photo opportunity uban sa mga mayor sa Cebu kay siya nag-wheelchair.