LTO nag-awhag nga ipakuha na ang mga plate number sa ilang buhatan
Giawhag sa Land Transportation Office (LTO) 7 kadtong mga nilukat og rehistro sa ilang mga sakyanan niadtong Hulyo hangtod Disyembre 2016 nga kuhaon ang ilang mga plaka tungod kay dugay na kining naabot sa ilang buhatan.
Matod ni LTO 7 Regional Director Victor Emmanuel Caindec nga sukad naabot sa ilang buhatan ang mga physical plate number sa mga sakyanan, mga 20 pa ka plaka ang nakuha sa mga nanag-iya niini.
Di mominos mga 6,000 ka mga plaka ang naghuwat nga malukat karon sa LTO 7.
“Mao na ang irony, moyawyaw sila, ‘Ang LTO way plate number’ karon na nga naay plate number di panguhaon. Naa daghay reklamo, ang mga sakyanan kuno walay plate number karon nga naa nay plate number di panguhaon,” padayag ni Caindec dihang nahinabi ning mantalaan.
Dugang niya nga hagit karon sa mga dealer sa sakyanan sa pag-istorya sa mga tag-iya sa pagkuha sa plaka niini.
Pahimangno ni Caindec nga mas maayong ipakuha sa mga tag-iya ang plaka sa ilang mga sakyanan sa mga dealers niini aron di na sila mahasol pa sanglit way dakong kaparkingan sa buhatan sa LTO ug aron malikayan nga madakpan unya kini kon magpataka og parking.
“They have to pick it up with their dealers. They have to go to their dealers, otherwise magsige silag reklamo. We ask them to call your dealers, talk to them,” pahibawo ni Caindec.
Dugang niya nga kon ipakuha sa dealers ang plaka nagkinahanglan kini og special power of attorney tungod kay mao man kini ang gi-require sa balaod.