LTO Kiosk mopadali sa renewal sa rehistro
Sayon nalang alang niadtong mo-renew sa rehistro sa ilang sakyanan gamit ang labing unang Kiosk Motor Vehicle-Renewal (MV-Renewal) sa rehiyon 7 sa dihang gilusad kagahapon sa Land Transportation Office (LTO).
Gipangulohan ni LTO Regional Director Victor Emmanuel Caindec ang kalihukan kauban silang Rhommel Ragaza, Stradcom Operations Officer ug Adela Ybañez, Acting Chief sa Mandaue City District Office.
Si Caindec nagkanayon nga kining bag-ong gilusad nga LTO-Kiosk MV-Renewal makatabang aron mas mapadali ang mga transaction ilabi na sa pagrenew sa mga motor vehicle sa LTO.
“Technically, this is an automated machine, where you can transact with LTO already without having to go through the tellers for as long as you have the requirements in place,” pasabot ni Caindec. Usa ka makagamit sa bag-ong LTO-Kiosk kinahanglan makumpleto
usa ang mga requirements niini sama sa Certificate of Registration, Insurance ug Inspection Receipt. Kun kumpleto na sa mga gikanahanglan nga requirements pwede nang moderetso sa machine ug i-type ang mga kinahanglan nga impormasyon sama sa plate number, engine number or chassis number.
Human sa maong proseso mahimo nang molahos sa cashier alang sa pagbayad.
Matod ni Caindec nga kini nga proseso mas paspas itandi sa naandan nga pamaagi.
Kini ang una nga automated machine sa tibuok Central Visayas ug nagtinguha sab ang LTO nga magbutang og usa pa ka machine didto sa Cebu City District Office (CCDO).
Gibana-banang P500,000 ang budget sa machine apan libre kining gihatag sa Stradcom.
“We are are checking the systems there (CCDO), but we are also trying to see if it makes better sense to put in Lapu-Lapu,” matod ni Caindec.
Dugang niya nga kini usa sa mga nahuna-hunaan nila nga pamaagi aron malikayan ang mga fixer sa ahensya, mas maseguro nga adunay transparency
sa proseso nga gibuhat sa ahensya ug adunay control ang mga tawo sa proseso sa registration.