KANHI MGA DURIGISTA NAUSAB
Usa ang 39-anyos nga si Sonny (di tinuod nga ngalan) nga nabag-o human nipaubos sa Drug Recovery Intervention and Prevention Program sa Surrender to God (SuGod) diin gigamit ang pagtuo sa Ginoo aron mausab kini ug mahilayo sa ilegal nga drugas.
Si Sonny, kaniadto top 2 sa watchlist sa station 5 sa dakbayan sa Lapu-Lapu ug karon na cleared na kini tungod kay kapin sa usa ka tuig na kini nga wala nalambigit niining drugas.
Ang SuGod mao ang usa sa mangulo niining labing una nga B.I.G. Day (Be Intimate with God) diin usa ka adlaw kini nga praise, fellowship ug healing alang sa mga drug addicts.
Karong Dominggo, Agusto 26, gikan alas 8 sa buntag hangtod alas 5 sa hapon, himuon ang B.I.G. Day ug katambayayong sa SuGod mao ang Catholic Charismatic Community sa Sugbo.
Matod sa executive director ug founder sa SuGod nga si Fe Barino nga usa ning recovery programs nga alternatibo sa padayon karong pagpamatay nga nahitabo sa Sugbo subay sa kampanya sa gobyerno batok ilegal nga drugas.
“Dili patay ang answer sa atong problema karon,” si Barino nagkanayon.
Si Cebu Archbishop Jose Palma, mass celebrant ug guest speaker usab si Bro. Alvin Barcelona, Kerygma preacher kinsa usa usab ka singer ug musician.
Gibana-bana nga aduna’y 500 ka mga participante ang maong kalihokan gikan sa nagkadaiyang recovery group sa Sugbo.
Matod ni Jay Francisco, SuGod program director, nga lima na ka mga recovery groups ang nipasalig nga motunga sa maong kalihokan.
Mamahimo na kining binuwan nga aktibidad diin bukas kini sa tanang surrenderees bisan unsa paman ang ilang relihiyon.
Ang SuGod anaa na sa ilang batch 14 sa 10-day recovery program diin 600 na ang nigradwar. /