Go miabaga sa gasto sa bata nga dunay cancer

Gawas nga abagahon sa Malasakit Center ang gastuhan sa hospital sa 11-anyos nga bata nga taga Bohol nga aduna’y sakit nga leukemia, nipasalig usab si Special Assistant to the President Christopher “Bong” Go nga tabangan niya ang maong bata sa pagtungha.

Ang bata nga si Jomel Montes na-admit sa Governor Celestine Gallares Memorial Hospital sa dakbayan sa Tagbilaran sa Bohol ug human nga ni-viral ang post sa usa ka netizen kabahin sa kondisyon niini, gidala ang bata sa Vicente Sotto Memorial Medical Center sa Sugbo aron maatiman ug makapahimulos sa Malasakit Center nga programa sa administrasyong Duterte.

Niadtong Martes, atol sa pagbisita sa presidente sa Sugbo, gibisita usab ni Go ang bata sa tambalanan ug nipasalig nga abagahon ang bayranan sa tambalanan pinaagi sa Malasakit Center.

“Nangako rin akong ipaaral siya kung sakaling gumaling po,” si Go nagkanayon.

Ang amahan ni Jomel nga si Edgar usa ka manananggot hinungdan nga way kwarta nga pangsuporta sa pinansiyal nga gikinahanglan sa sakit sa bata.

Matod ni Go nga dihang nakahibaw siya sa maong post sa Facebook, dali niyang gimanduan ang Office of the Presidential Assistant for the Visayas (OPAV) nga tabangan kini diin gidala ang bata gikan sa Bohol paingon sa Sugbo.

“Nandito naman po ang gobyerno ni Pangulong Duterte na tutulong, at yung Malasakit Center. Sabi ko sa magulang, aasikasuhin namin lahat ng mga pangangailangan nila. Kami na po ang bahala. Sabi ko asikasuhin na lang nila ang anak nila, sana gumaling. Sabi ko magdasal sila,” si Go nagkanayon.

Nitunol usab si Go og cash assistance sa pamilya ug gihatagan og cellphone si Jomel nga damgo nga makuha sa bata.

Si Go mao ang usa sa nagpasiugda sa Malasakit Center sa Tacloban, Iloilo, ug Cebu ug plano niya nga palapdan pa kini hangtod sa Mindanao.

Ang Malasakit Center usa ka one-stop shop nga naggiya sa pasyente sa nagkadaiyang ahensiy susama sa Department of Social Welfare and Development, PhilHealth, Department of Health, ug Philippine Charity Sweepstakes Office aron maminusan ang bill niini sa tambalanan.