Magpale iduso pagka gobernador?

Bise Gobernador Agnes Magpale napilian nga himuong kandidato pagka-gobernador sa Sugbo sa partidong Hugpong ng Pagbabago ni Davao City Mayor Sara Duterte-Carpio.

Giklaro hinuon ni Magpale nga “tsismis” lang kini apan di kini ang unang higayon nga nakadungog siya sa maong hungihong.

Nakugang si Magpale dihang gipangayo-an og reaksiyon o katin-awan sa giingong tinguha sa partidong Hugpong ng Pagbabago nga himuon siyang ilang kandidato sa pagka-gobernador sa Sugbo sa 2019 elections.

Matod niya, wa siya makadawat og pormal nga imbitasyon gikan sa maong partido, kinsa ang founder mao ang anak ni Presidente Rodrigo Duterte nga si Mayor Sara Duterte-Carpio. Wa sab siyay komunikasyon ngadto sa kadagkuan sa HNP.

Gihulagway sa bise gobernador nga tsismis kini apan giangkon niya nga dili kini ang unang higayon nga nakadungog siya sa maong spekulasyon.

Nagdumili hinuon pagtug-an ang opisyal kon kinsa ang unang nakasulti kaniya bahin niini.

Wa masayod si Magpale kon may komunikasyon sab ang HNP ngadto sa iyang partido nga Barug Alang sa Kauswagan ug Demokrasiya (BAKUD).

Nakakuha hinuon og impormasyon ang opisyal nga gitakda untang modu-aw si Presidente Duterte sa Danao City kagahapon atol sa iyang pag-anhi sa Sugbo.

Subling gipadayag ni Magpale ang iyang tinguha pagretiro na sa pulitika.

Padayon hinuon siyang gihangyo ni Gobernador Hilario Davide III nga mamahimo gihapon niyang running mate sa sunod nga piniliay.

Si Davide, sa iyang bahin, niingon nga wala siyay problema kon kuhaon sa HNP si Magpale apan hangtud nga chismis pa kini, di una siya motuo niini.