Duterte wa nay salig sa kapulisan sa Rehiyon 7?

Sama sa nangagi, imbes anino sa mga proyekto ug plano sa kalambuan maoy atong madungog, mga birada kalabot sa gidiling drugas mao gihapon ang gibatbat ni Presidente Rodrigo Duterte sa iyang pagbisita sa Sugbo niadtong Martes. Unya lagi kay drugas man ang hisgutan, di niya malikayan ang pagbalik-balik og hisgut na usab sa ngalan ni retired Police General Vicente Loot kinsa mayor na karon sa lungsod sa Daanbantayan.

Ang nakakuha og maayo sa atensiyon sa kadaghanan, mao ang paghingalan sa presidente ngadto sa mga pulis dinhi sa Rehiyon 7, opisyal man o dili, nga mga drug addict ug nakigkumboya sa mga drug personalities dinhi sa Sugbo lakip na ang pipila ka mga sakop sa Philippine Drug Enforcement Agency (PDEA).

Special mention usab ang dakbayan sa Talisay nga taliwala sa hugot nga kampanya sa presidente batok sa illegal drugs padayon gihapon kining mikatap sa maong siyudad.

Wa mopalag ang kontrobersiyal nga hepe sa Regional Office-Central Visayas nga si Director Debold Sinas sa pamahayag ni Duterte ug igo ra kining miingon nga makapaalarma ang ilang nadungog gikan sa presidente.

Mao usab ang bag-ong hepe sa Talisay City Police nga si Marlu Conag kinsa yano ra usab nga miangkon sa pamahayag sa presidente nga grabe ang paghitak sa gidilling drugas sa ilang dapit.

Ang duha mibutyag nga ang gipamulong ni Duterte wala makapalusno sa ilang moral ug ila kining gikonsiderar nga dakong hagit sa ilang liderato.

Pero dili ba masabot man usab nga hasta ang presidente wala na diay pagsalig kanila kay gihinganlan man lagi sila og mga og mga adik? Ang gipamulong sa presidente susama ra nga iya usab giawhag ang publiko nga dili na mosalig kanila.