Research Caravan sa Central Visayas
Gipahigayon sa Central Visayas Consortium for Health Research Development (CVCHRD) ang usa ka Research Caravan sa rehiyon aron pagduso sa mga kalihokan ug mga programa sa kahugpongan.
Gituboy sab sa maong caravan ang mga serbisyo ug programa sa Philippine Council for Health Research and Development (PCHRD) ubos sa Department of Science and Technology (DOST). Gipahimuslan sab ang caravan sa Health Research and Development Information Network (HERDIN), nga ubos sab sa DOST, sa pagpahigayon sa pipila ka mga pagtuon.
Gipasiugda sa CVCHRD Committee on Research Information and Utilization (CRIU), nalangkoban sa maong caravan ang mga probinsya sa Sugbo, Bohol, Negros Oriental ug Siquijor.
Nabisita niini ang Siliman University sa Dumaguete City, Siquijor State College sa sila sa Siquijor ug Holy Name University sa Bohol ning bag-o pa lang.
Nisunod sa pipila ka mga adlaw ang panagtipon sa HERDIN Cebu chapter didto sa Josef Baumgartner (JB) Learning Resource Center (LRC) sa University of San Carlos (USC) Talamban campus, mibutyag si Marciana R. Mariñas, USC Science & Technology librarian.
Human sab sa pipila ka semana, gipahigayon sab ang Central Visayas Health Research & Innovation Conference (CVHRIC) sa Cebu Normal University (CNU).
Gipahigayon sab sa HERDIN Central Visayas ang dakong panagtipon didto sa Cebu Institute of Technology University (CIT-U) diin natuki ang mga isyu ug gikabalak-an kabahin sa pag-encode ug pag-update sa database sa kahugpongan dinhi sa tungatungang Kabisay-an.