Ex-PBA Mente nakabsan og kinabuhi

Mipanaw kagahapon ang kanhi magduduwa sa Philippine Basketball Association (PBA) nga si Joey Mente gumikan sa sakit nga cancer.

Si Mente naila gumikan sa iyang kataas og layat nga nagpahimo kaniyang PBA Slamdunk champion, sa iyang acrobatic shots ug wala’y kahadlok nga mga lusot.

Apan alang sa mas nakaila kang Mente, ang pagkakomedyante niini ang dili mawagtang sa ilang alimpatakan.

“His teammates will remember him for his sense of humor,” matod ni Olsen Racela, kinsa kasamtangang assistant coach sa Barangay Ginebra Gin Kings ug kanhi kauban ni Mente sa San Miguel Beermen. “Kenkoy, makulit, at palaging nagpapatawa,” paghulagway ni Racela kang Mente, kinsa taodtaod na sab nga nakigbugno sa iyang sakit.

Ang 10th overall pick sa Beermen niadtong 2001 PBA draft nakabsan sa iyang kinabuhi samtang nagpaubos sa

chemotherapy sa iyang yutang natawhan sa Samar. Nagedad kini og 42.

Nagduwa si Mente sa Beermen gikan niadtong 2001 hangtod sa 2005 diin nakakuha kini og titulo sa 2001 All-Filipino ug 2005 Fiesta Cup.

Ang igsuon ni Mente nga si Mytea maoy nagpahibalo sa Beermen sa nahitabo sa iyang igsuon. “He’s a guy who has so much energy on and off the court,”

paghinumdom ni Racela kang Mente.

“We all know him as a tough and very athletic guard, who became a slam dunk champion.”

Nahimo siyang slamdunk king sa PBA niadtong 2001.

Gikan sa San Miguel, si Mente nabalhin sa Welcoat (Rain or Shine sa kasamtangan) diin nagduwa siya gikan 2006 hangtod 2008.

Sa wala pa siya nisulod sa PBA, naila na sab si Mente sa nabungkag nga Metropolitan Basketball Association (MBA) ubos sa kampo sa Iloilo Volts.

Sa sayong bahin ning tuiga, nasuta nga adunay duha ka tumors si Mente, usa sa ulo ug usa sa dughan.

Gipaubos sa operasyon si Mente unya gipaubos sa radiation treatment una ang chemotherapy.