SOBRA PA SA P6M MADAWAT NI DIAZ
Duterte mopahalipay sab sa Asiad gold winner
Sobra pa sa P6 million ang gilaumang madawat nga insentibo ni weightlifter Hidilyn Diaz sa iyang paglangkat og gold medal sa 18th Asian Games niadtong Martes sa gabii sa Jakarta, Indonesia.
Ang lumad nga taga Zamboanga City segurado nang makadawat og P6 million nga gibahi’g sa P2 million gikan sa Philippine Olympic Committee, P2 million sab gikan sa Philippine government pinaagi sa Republic Act 10699, ug tag 1 million gikan sa Siklab Foundation ug Philippine Ambassador to Indonesia Lee Hoong.
Labing seguro, mohatag sab og pahalipay si Presidente Rodrigo Duterte ngadto kang Diaz gumikan sa dakong dungog
nga nahatag niini sa nasod.
“Siguro po naman, meron po iyan at galing din sa mga pribado nating sector,” matod ni presidential spokesperson Harry Roque sa interbyu sa radio dzRH nga napatik sa GMAnews.tv.
Mismong si Duterte mianunsyo sa kalampusan ni Diaz sa usa ka kalihukan kauban ang Visayas local chief executives sa miaging gabii dinhi sa Sugbo.
Gipadayag ni Duterte nga kon aduna makakuha siya og kahigayunan, personal niyang i-congratulate ang miyembro sa Philippine Air Force.
Si Diaz milangkat sa bulawan sa women’s 53-kg. Division diin nakaalsa siya og 92 kgs. sa snatch ug 115 kgs. sa clean and jerk alang sa kinatibuk-ang 207 kgs.
Niadtong Agusto, 2016, gikataho nga nakadawat siya og P2 million nga pahalipay gikan kang Duterte tungod sa iyang paglabni og silver medal sa Rio Olympics. Sa kinatibuk-an, miabot sa P7
million ang pahalipay nga nadawat ni Diaz niadtong higayuna.
Sa laing bahin, kinasingkasing nga nagpasalamat si Diaz sa Ginuo, sa iyang pamilya ug sa mga nagsuporta sa iyang kampanya. “Masaya ako sa naging resulta ng laro, sa lahat ng paghihirap na ginawa ko sa training, preparasyon, then na-surpass ko ‘yung pressure
na nararamdaman ko before the competition. So thankful ako kay God,” matod ni Diaz sa programa sa GMA 7 nga Unang Hirit. Nagpasalamat sab si Diaz sa iyang mga kababayan.
“Maraming maraming salamat sa mga kababayan na sumusuporta, nagsisigaw, kinabahan at nag-pray para sa success ng
Pilipinas at ako,” dugang ni Diaz. Sa iyang paglangkat sa bulawan, nakabalos sab si Diaz kang Kristina Shermetova sa Turkmenistan, kinsa maoy naglupig kaniya sa World Championships niadtong 2016.
Si Shermetova igo lang nakaalsa og kinatibuk-ang 206 kgs., usa ra ka kilo ang deperensya sa naalsa ni Diaz.
Gipadayag ni Diaz nga malipayon siyang iya nang nalupig si Shermetova. “Yes po. Para sa akin, masaya kasi natalo ko sila,” batbat ni Diaz.
Niini pa lang ka sayo, nagtutok na si Diaz sa sunod niyang pangandama, ang 2020 Tokyo Olympics.
“Hindi po madaling makapunta sa Olympics. Ang dami ko pa pong lalaruin na competition,” pasabot ni Diaz.
“And I really need your prayers hanggang Tokyo 2020. At sana hindi ako maggi-give up hanggang sa Tokyo 2020 kasi sobrang hirap po talaga ng training, sobrang daming sakit na kailangang pagdaanan.”