3 NATIPI SA PULIS
75 NADAKPAN SA TIBUOK SA CEBU SA ONE TIME, BIG TIME
Tulo ang nangamatay, 75 ka mga tawo ang nadakpan sa One Time, Big Time operation sa kapulisan kagahapon sa buntag sa lainlaing mga dapit sa Sugbo.
Ang tulo nga giingong nangalambigit sa illegal drugs giingong nanukol sa mga pulis.
Si Superintendent Marlu Conag, hepe sa Talisay City Police Station nga nahinabi sa Superbalita Cebu, nibutyag nga mga alas 6:05 sa buntag kagahapon, nipahigayon sila og buy bust operation sa Sitio Magay, Barangay Tangke, Talisay City.
Sumala pa niya nga atol sa
operation, nisukol si Parolito Obrero, subject sa buy-bust, samtang nasikop ang kakunsabo nga si Robinson Dejacto, alyas Binson.
Nakasakmit sila og daghang pakite sa shabu ug kagamitan sa illegal nga drugas.
Lakip sa nasakmit ang usa ka .38 caliber revolver nga gigamit sa suspek nga dunay tulo ka mga bala.
Ang suspek bag-o lang nga nailhang drug pesonality ug
dead-on-arrival sa tambalanan. Sumala pa ni Conag, nga gawas sa namatay, nakasikop sab silag 13 ka mga tawo sa lainlaing lugar sa Talisay kagahapon sa buntag nga nalambigit sa illegal nga kalihukan.
HVT SA MOALBOAL
Samtang patay sab ang usa ka giingong high value target human misukol sa pag-serve sa
search warrant kagahapon sa buntag sa Barangay Poblacion East, lungsod sa Moalboal.
Si Philjon Ediza dead-on-arrival sa Badian District Hospital human giiingong nisukol sa joint team sa Moalboal Police, Provincial Intelligence Branch (PIB) ug Provincial Mobile Force Company.
Si PO3 Wilfredo Rosal, sa Moalboal Police Station nga nahinabi sa Superbalita Cebu nga nagkanayon nga may kalambigitan sa paghupot og ginadiling drugas ang gi-serve nga search warrant nga gi-isyu ni Judge Leopoldo Cañete, sa Regional Trial Court (RTC) 7 Branch 60 sa lungsod sa Barili.
Apan sa pag-serve sa mga pulis, giiingong namusil si Ediza.
Usa ka pulis ang naigo, apan swerte kay nakasul-ob sa iyang bullet proof vest.
Nibawos ang mga pulis hinungdan sa pagka-igo sa suspek sa lainlaing bahin sa lawas nga miresulta sa kamatayon. Nakuha sa kapulisan sa
crime scene ang duha ka medium nga putos sa shabu, 10 ka small nga putos sa shabu, usa ka kalibre .45 nga pistola,
magazine, daghang mga bala, kabhang, lima ka selpon, tulo ka motorsiklo, timbangan ug
cash nga P6,000.
Si Rosal nibutyag nga si Ediza sakop kaniadto sa namatay nga drug lord sa ilang dapit nga si Christian Aquino.
NANUKMOD
Usa ang patay samtang 16 ang nadakpan sa unom ka buy-bust, upat ka checkpoint atol sa one-time big-time (OTBT) sa Mandaue City Police Office (MCPO) sukad niadtong Miyerkules hangtod kagahapon
Ang napatay atol sa operasyon sa Station 5 sa MCPO giingong nanukmod ug nanion sa poseur buyer human mabantayi niini nga pulis iyang ka-transaksyon.
Giila ang napatay nga suspek nga si Eugene Raboy Fermin, 45, taga Purok Tambis, Barangay Umapad sa dakbayan.
Si Fermin gipalitan og P1,500 nga shabu sa pulis ug wa magpailang informant atol sa operasyon sa Purok Star Apple sa maong barangay niadtong Miyerkules, pasado alas 10 sa gabie.
Sumala sa hepe sa Station 5 sa MCPO nga si Senior Inspector James Conaco nga nalamba sa yuta ang iyang kawani nga nagpailang buyer atol sa insidente.
Nibunot na og armas ug gitiunan na ang pulis sa suspek, apan maayo nalang nakauna og pusil niini ang back-up.
Daling gidala sa Mandaue City Hospital si Fermin, apan namatay ra dayon. /