Manifesto gitunol na sa Nasukhu sa PRO 7

Nagbelo og itom ug nagbibit og lungon nga adunay pangan sa 4-anyos nga batang si Skyler Abatayo ug laing 23 ka mga indibidwal nga nangamatay, mao kini ang gihimo sa mga miyembro sa Nagpakabanang Sugbuanon alang sa Kinabuhi ug Hustisya (NASUKHU) dihang nimartsa kini paingon sa Police Regional Office (PRO) 7 kagahapon sa buntag aron itunol ang ilang manifesto kabahin sa ilang kabalaka sa pagpamatay nga nahitabo karon sa Sugbo.

Human sa usa ka public forum sa University of San Carlos - Main Campus nimartsa ang dul-an 300 ka mga miyembro sa nagkadaiyang cause-oriented groups sa Sugbo nga nagkahiusa batok niining padayon nga pagpatay sa Sugbo.

Atol sa public forum kagahapon nitambong si Commission on Human Rights (CHR) 7 chief investigator Leo Villarino diin gitunol kaniya ang maong manifesto.

Nakamugna og gamay nga kahuot sa trapiko ang gihimo nga protesta sa Nasukhu kini human ubay-ubay ang ni martsa gikan sa USC paingon sa PRO 7.

Nihimo og gamayang dayalugo ang grupo ug gibasa ni Atty. Vincent Isles sa Tindig Pilipinas ug The Silent Majority ang manifesto sa grupo.

Kaninumduman nga niabot sa 48 ka mga cause-oriented groups ang nilakip sa maong panawagan batok sa pagapamatay nga nahitabo karon sa Sugbo.

Digang nahuman na kini og base ni Isles, ilaha kining gihatag sa pulis nga anaa mag-atang sa gate sa PRO 7 apan sa una nagdumili kini pagdawat, naabtan og pipila ka minutos bag-o kini hingpit nga gidawat sa kapulisan

Nasayran nga usa si Skyler sa mga bata nga namatay human aksidente nga naigo kini sa saag mga bala dihang nagpahigayon sila og operasyon batok drugas.

Si PRO 7 regional director Debold Sinas nagkanayon nga nadawat nila ang maong manifesto, “We received their manifestos, we will study it and we will keep you informed.”

Human nila kini nasumiter nipadayon og martsa ang grupo paingon sa dan Colon.

Ang Nasukhu adunay 48 ka mga cause-oriented groups sa nagkahiusa niining kabalaka nila sa pagdayong pagpatay sa Sugbo.

Mao kini ang ikaduhang organisasyon nga nihimo og manifesto batok niining padayon nga patay, sunod sa Commission on Laity sa Archdiocese of Cebu.