GWARDIYA GITIPI SA MANDAUE CITY

Patay ang usa ka gwardiya nga padung na unta mobiya sa trabaho human gipusil sa duha ka riding-in-tandem nga mga suspek didto sa Singson Village, Brgy. Tipolo, dakbayan sa Mandaue kagahapon sa buntag.

Namatya diha-diha ang biktima nga si Wendell Lou Paciencia, 38, sikyo sa Parisan Security, ug residente sa Paciencia Compound, Brgy. Tipolo, sa dakbayan sa Mandaue.

Matod ni P/CInsp. Mercy Villaro, information officer sa Mandaue City Police Office (MCPO), nga personal grudge ang gitan-aw nila nga motibo sa pagpamusil.

Ila pa sad nga gi-background check ang biktima kon aduna kini mga nakabangi.

Gibutyag sa imbestigador gikan sa Station 2 sa MCPO nga si SPO1 Ricardo Petiluna nga ang biktima naghubo nas iyang uniporme ug naa sud sa guard house dihang nahitabo ang pagpamusil pasado alas 7 sa buntag.

Samtang naghuwat sa mopuli nga gwardiya ang biktima, kalit nga niabot ang duha ka mga motor diin sakay ang mga suspek.

Ang usa sa mga suspek kalit nga ninaug ug nipusil sa makadaghang higayon samtang ang biktima naigo sa nagkadaiyang parte sa iyang kalawasan.

Sumala ni Petiluna nga base sa ilang nahinabi nga nakasaksi nga nakaagi sa crime scene nga nakadungog kini og buto-buto ug nakakita siyag nanagan ug naniyagit na ang mga tawo.

Sunod niyang nakit-an mao ang gwardiya nga nahagba ug nagkadugo.

Dugang pa niini nga ang mga suspek nagsul-ob og surgical mask, helmet ug sayon ra nga naglakaw-lakaw sa dapit.

Human sa insidente, daling nisibat palayo sa crime scene ang mga suspek.

Narekober sa crime scene ang unom ka mga bala sa kalibre .45 nga armas ug laing duha ka bala sa maong armas.

Gidala sa St. Jude Funeral Parlor ang patayng lawas sa biktima samtang ang mga gamit niini gi-turn-over sa inahan ni Paciencia.

/ HINATAG NGA HULAGWAY ■ NAMUSIL: Nakuhaan og hulagway pinaagi sa closed circuit television (CCTV) camera ang mga suspek nga mipusil patay sa security guard nga si Wendell Lou Paciencia kagahapon sa buntag didto sa Barangay Tipolo, dakbayan sa Mandaue.