Wa magamit sa eleksyon ang unliquidated cash advances: Salubre
Gipaneguro ni Provincial Treasurer Roy Salubre nga way bahin sa unliquidated cash advance nga iyang nakuha sa Kapitolyo ang nagamit sa politika o eleksiyon niadtong 2010.
Gipasalig usab niya nga maliquidate na kini sud karong tuiga, sa higayon usab nga makuha na niya ang tanang supporting documents.
Maobot sa kapin P26 milyones ang unliquidated cash advances ni Salubre, diin P25 milyones niini ang gitagana alang sa intelligence expenses ug na-release pipila ka adlaw sa wa pa ang 2010 elections.
Taliwala niini, gipaneguro ni Salubre nga wala magamit sa politika o eleksiyon niadtong hi- gayona ang nahisgutang pundo.
Tungod kay intelligence fund ang gihisgutan, wa na usab siya mohatag og dugang detalye kon unsay gigamitan niini apan matod pa, nagamit kini sa kapulisan.
Gipasabot ni Salubre nga nakahimo na siyag inisyal nga liquidation sa cash advances ubos sa iyang pangalan niadtong 2010 apan matod niya nga sa maong tuig, nag-usab ang Commission on Audit sa mga supporting documents nga kinahanglang isukip niini.
Matod niya, nahibawo na ang Provincial Accounting Office labot niini ug naglibog siya kon nganong gihatagan gihapon siya ug demand letter.
Ang pagkawagtang sab niya sa Kapitolyo niadtong 2013 nakatampo sa wa na niya pagka-comply sa gikinahanglang dokumento. Bisan pa niini, gipaneguro ni Salubre nga sulod niining tuiga, moadto siya sa COA sa kauluhan aron hatagan ug husay ang maong mga cash advances.