Way napalgang drugas sa city jail

Niabag ang mga mayor sa Cebu City Jail Male Dormitory sa mga tinugyanan sa balaod sa pagsumpo sa ilegal nga drugas sud sa prisohan.

Tungod niini, way nakuhang ilegal drugas sa gipahigayong greyhound operation kagahapon sa buntag.

Mapasalamaton si Cebu City Councilor Dave Tumulak sa mga mayor sa Cebu City Jail tungod kay sila mismo ang nikombati aron mapugngan ang pagpamligyag illegal drugs.

Kutob sa ilang masakpan nga namaligyag og ilegal nga drugas sud sa prisohan, ang mga mayor na mismo ang mobartolina ug di sila makadawat og bisita kutob sa moduaw nila.

Karong tuiga, katulo na gipahigayon ang kalit nga greyhound operations sa mga awtoridad, usa sa miaging buwan ug duha karong buwana.

Matod ni Tumulak nga gibuhat kini sa mga awtoridad tun- god kay kasagaran sa mogawas nga report nga madawat sa kapulisan nga kutob sa madakpan anaa sa sud sa prisohan ang tinubdan sa drugas.

Gani niadto lang Lunes nadakpan si Reinhard Baring Moreno, 29, taga Upper Kawayan, Barangay Sambag 2 atol sa buy bust operation sa Abellana police station didto ra mismo sa iyang dapit.

Mokabat sa P6.5 milyones nga balor sa ilegal nga drugas ang nasakmit sa kapulisan gikan kang Moreno.

Matod pa gipanag-iya kini sa usa ka dakong drug personality nga adunay kontak sa usa ka piniriso sa Cebu City Jail.

Hinungdan nga kagahapon kalit nga greyhound operations ang gihimo.

“Way nakuha nga drugas hinuon dunay mga cellphone nakuha ug ang uban nga cellphones makatabang sa atong kapulisan sa pag imbestigar sa drugas nga anaa sa City Jail, Sukwahi ni sa nahitabo sa Talisay nga perting daghanang nakuha nga drugs,” dugang ni Tumulak.