Property tax sa Carcar nalangay pag-release

Nalangay og dul-an duha ka tuig ang pag-release sa kagamhanan sa siyudad sa Carcar og 30 porsiyento nga bahin gikan sa basic real property taxes (RPT) nga dunay kinatibuk-ang kantidad nga P4.825,255.18 ngadto sa 15 ka mga barangay.

Sumala ni City Treasurer Neneth Abellana, naandam na nila ang mga dokumento apan nataligam-an tungod kay nibalhin sila ngadto sa bagong city hall gikan sa ilang kanhi daang edipisyo.

Matod niya nga nadungan og dawat sa mga barangay ang ilang mga bahin sa RPT alang sa 2016 ug 2017 karong tuiga.

Sigon niini gagmay ra ang bahin sa mga barangay kay mag-agad kini sa ilang koleksyon ug sa gidak-on sa matag barangay.

“Kon motabang sila namo paghatag anang notice gani, dako mig collection kay wa man mi kaila anang uban gud,” dugang ni Abellana dihang nahinabi sa Superbalita Cebu kagahapon.

Ang gagmay nga mga barangay modawat og average nga bahin nga kapin sa P30,000 ngadto sa P60,000 samtang ang dagko nga mga barangay sama sa Perrelos, modawat og average nga P100,000 nga bahin.

Ang 15 ka mga barangay sa Carcar mao ang Bolinawan, Buenavista, Calidngan, Can-asujan, Guadalupe, Liburon, Napo, Ocaña, Perrelos, Poblacion I, Poblacion II, Poblacion III, Tuyom, Valencia ug Valladolid.

Ubos sa Section 271 sa Republic Act 7160, ang bahin sa matag barangay sa RPT kinahanglan i-release, nga di na manginahanglan og dugang aksyon, direkta ngadto sa barangay treasurer, sud sa lima ka adlaw human matapos ang matag quarter.

Base sa pakisusi sa Due to LGUs account, nagpakita nga ang pag-release sa 30 porsiyento nga bahin gikan sa basic RPT ngadto sa 15 ka mga barangay nalangay og 635 ka mga adlaw, sigon sa 2017 audit report sa Commission on Audit.

Ang kantidad sa RPT shares nga ihatag ngadto sa matag barangay gibase sa Monthly Schedules of the Amount to be Transferred to Each Barangay (MSATEB) nga giandam sa City Treasurer’s Office (CTO).

Hangtod sa Disyembre 31, 2017, ang 30 porsyento sa bahin sa RPT nga kinatibuk-ang nikabat og P4.8 milyones wala pa mabalhin ngadto sa mga barangay.

“The delay in the transfer of the 30 percent RPT shares of barangay not only delayed the implementation of the projects but also deprived the constituents from its expected benefits,” sumala sa mga state auditor.

Kini nga obserbasyon gipandangat sa COA ngadto sa mga opisyal sa Carcar City Government pinaagi sa Audit Observation Memorandum No. 2018-016 nga pinetsahan og Pebrero 21, 2018.